"Now up and ride, LAIRD EGLINTON, That was sae stout in stour, That when it rainit cats and dogs, Aye jousted through the shower. "Now, horse! my provosts and baillies, And convener of the Trades, Dean o' Guild, and maister o' Merchants, The auld Lion craves your aids. "It's up on your ain middens, My cocks, sae croose to craw, And gar play your Scottish fiddles, And your Scottish bag-pipes blaw. "And they hae ta'en and sworn an aith-- An aith both strang and true-- That for the auld Lion o' Scotland They will win back his due. "I've a sair, sair pain in my belly, And a sair catch in my breath; Ye'll mind it was English misdoings That brocht me to my death. "And ye've aye uphauld, sae bluff and bauld, My right my tail to wag, Aboon the pock-puddins' Lion Upon the Scottish flag. "Ye'll to the Prince Royal o' Scotland-- Him the Southrons misca's 'Wales,' And ask him what gars his household Wear breeks aboot their tails? "Why a Scots' prince hasna aboot him Scots' men and places got, A' things Scots, but the wages, whilk should be Punds sterlin', and no punds Scot. "Say there's a keeper o' the swans Whose office ocht to cease, Or Scotland behoves a keeper too, To keep her Solan geese. "There's the maister o' the music, That the music maks ava', For his thousand puns' a year I trow he were best awa'. "Or if no that Scotland ocht to brink Her music-maister too, Wi' bagpipe and Scotch fiddle We'll find him wark to do. "And they have put down the Scottish mint, Nae money noo mak' we, I trow they hae sent to Brummagem To coin the Scots' bawbee! "And we hae Parliament Members eneuch Our votes wi' place to buy; There's many a gude job in England, But nae Scots' thumb in the pie. "And Holyrood Park is a bonny place, But 'tis nae place for me and you; And the Embro' baillies lets it For a kailyard oot to feu. "And oh, 'tis in geography We're driven to the wa'-- Till in the map o' Europe We're hard to find ava'; "And when a Scotsman's to be hung (E'en Scotland rogues will plague) There's nae a Scottish hangman to fit The noose about his craig. "Now, well-a-day, and wae is me, For the days of auld lang syne, When wi' England we had nocht to do Save liftin' o' her kine! "The Lion o' a kingdom small I trow I'd suner be, Than the Lion of an empire vast When there's ither there than me." * * * * * A CHANCE FOR THE POOR CLERGY.