[A] Þe lorde ful lowde with lote, & la3ed myry, 1624 When he se3e sir G: with solace he speke3; Þe goude ladye3 were geten, & gedered þe meyny, [B] He schewe3 hem þe schelde3, & schapes hem þe tale, Of þe largesse, & þe lenþe, þe liþerne3 alse, 1628 Of þe were of þe wylde swyn, in wod þer he fled. Þat oþer kny3t ful comly comended his dede3, & praysed hit as gret prys, þat he proued hade; [C] For suche a brawne of a best, þe bolde burne sayde, 1632 Ne such sydes of a swyn, segh he neuer are. Þenne hondeled þay þe hoge hed, þe hende mon hit praysed, & let lodly þerat þe lorde forte here: [Fol. 113.] [D] "Now Gawayn," quod þe god mon, "þis gomen is your awen, 1636 Bi fyn for-warde & faste, faythely 3e knowe." "Hit is sothe," quod þe segge, "& as siker trwe; Alle my get I schal yow gif agayn, bi my trawþe." [E] He [hent] þe haþel aboute þe halse, & hendely hym kysses, 1640 & efter-sones of þe same he serued hym þere. "Now ar we euen," quod þe haþel, "in þis euen-tide, Of alle þe couenauntes þat we knyt, syþen I com hider, bi lawe;" 1644 [F] Þe lorde sayde, "bi saynt Gile, 3e ar þe best þat I knowe, 3e ben ryche in a whyle, Such chaffer & 3e drowe." [Sidenote A: The lord of the land is well pleased when he sees Sir Gawayne,] [Sidenote B: He shows him the shields of the wild boar, and tells him of its length and breadth.] [Sidenote C: Such a "brawn of a beast," Sir Gawayne says, he never has seen.] [Sidenote D: Gawayne takes possession of it according to covenant,] [Sidenote E: and in return kisses his host,] [Sidenote F: who declares his guest to be the best he knows.] XXI. 1648 [A] Þenne þay teldet table3 [on] trestes alofte, [B] Kesten cloþe3 vpon, clere ly3t þenne [C] Wakned bi wo3e3, waxen torches Segge3 sette, & serued in sale al aboute; 1652 [D] Much glam & gle glent vp þer-inne, Aboute þe fyre vpon flet, & on fele wyse, [E] At þe soper & after, mony aþel songe3, As coundutes of kryst-masse, & carole3 newe, 1656 With alle þe manerly merþe þat mon may of telle. [F] & euer oure luflych kny3t þe lady bi-syde; Such semblaunt to þat segge semly ho made, [G] Wyth stille stollen countenaunce, þat stalworth to plese, 1660 Þat al for-wondered wat3 þe wy3e, & wroth with hym-seluen, Bot he nolde not for his nurture nurne hir a-3ayne3, Bot dalt with hir al in daynte, how-se-euer þe dede turned to wrast; 1664 [H] Quen þay hade played in halle, As longe as hor wylle hom last, [I] To chambre he[1] con hym calle, & to þe chem-ne þay past.