And that he be watched alle that night ... hym that he is watched and light in his Chambre alle that night that his counsaille may wite how that he slepeth. And in ye mornyng whanne he goeth to his Masses that his herneys be leyed at ye North end of ye Auter and covered wt a cloth that ye gospell may be redde over it and at ye laste masse for to be blessed wt ye preist and whanne he hath herde his Masses thanne to goo to his dyner. And soo to his Armyng in ye forme aforesaide. And whanne he is armed and alle redy thanne to come to ye feelde in forme to fore rehersed, thanne ... his counsaille bounden to counsaille hym & to teche hym how he shal gouverne hym of his requests to ye kyng or he come into ye feelde and his entrie into ye felde and his gouvernance in the feelde for ye saide Counsaille hath charge of hym before Constable and Mareschal til that Lesses les aller be cryed. The whiche requestes ben thus that ye saide Appellant sende oon his counsaille to the kyng for to requeste hym that whanne he cometh to ye barrers to have free entrie wt his counsaille Confessour & Armorers wt alle maner of Instruments wt breede & wyne hymself bringing in in an Instrument that is to saye a cofre or a pair of bouges. Also their fyre cole & belyes and that his chayre wt [379] certaine of his Servants may be brought into ye feelde and sette up there the houre of his comyng that it may cover hym and his counsaille whanne he is comen into ye feelde this forsaide gentilman Appellant comyng to ye Listes whether he wol on horsebak or on fote wt his counsaille Confessour & other Servaunts aforesaide havyng borne be fore hym by his counsaille a spere a long swerde a short swerde & a dagger fastined upon hymself his swerdes fretted and beasagewed afore ye hiltes havyng noo maner of poyntes for and ther be founden that day on hym noo poyntes of wepons thanne foirre, it shall tourne hym to gret reproof. And this gentilman appellant that come to ye barrers at ye Southeest sone, his visier doune And he shal aske entrie where shal mete hym Constable and Mareschal and aske hym what art thou. And he shal saye I am suche a man & telle his name to make goode this day by ye grace of God that I have saide of suche a man and tell hys name bifore my Souain Lord and they shal bidde hym putte up his visier and whanne he hath put up his visier they shal open the barrers and lette hym inne and his counsaille before hym & wt hym his Armorers & his servaunts shal goo streight to his chayer wt his breed his wyne & alle his instruments that longe unto hym save his weppons. And whanne he entreth into the felde that he blesse hym soberly and so twys or he come to before his Souverain Lord And his Counsailles shall do thair obeisaunce before thair souverain Lord twys or they come to the degrees of his scaffolde and he to obeye him wt his heed at both tymes Then whanne they to fore thair souverain Lord they shal knele a downe