"Sone aftur yu a whyle, The ryche Kynge of Cesyle To the Emperour gaun wende, A ryche present wyth hym he browght, A cloth that was wordylye wroght, He wellcomed hym at the hende.[54] "Syr Tergaunte, that nobyll knyghte hyghte, He presented the Emperour ryght, And sette hym on hys kne, Wyth that cloth rychyly dyght. Full of stones ther hit was pyght, At thykke as hit myght be, Off topaze and rubyes, And other stones of myche prys, That semely wer to se, Of crapowtes and nakette, As thykke ar they sette For sothe as y say the. "The cloth was displayed sone, The Emperoer lokede therupone, And myght hyt not se, For glysteryng of the ryche ston Redy syght had he non, And sayde, How may thys be? The Emperour sayde on hygh, Sertes thys ys a fayry, Or ellys a vanyte. The Kyng of Cysyle answered than, So ryche a jewell ys ther non In all Crystyante. "The amerayle[55] dowghter of hethennes Made this cloth withouten lees, And wrowghte hit all with pride, And purtreyed hyt with gret honour, Wyth ryche golde and asowr,[56] And stones on ylke a side; And, as the story telles in honde, The stones that yn this cloth stonde Sowghte they wer full wyde. Seven wynter hit was yn makynge, Or hit was browght to endynge, In herte ys not to hyde. "In that on korner made was Idoyne and Amadas, With love that was so trewe, For they loveden hem wit honour, Portrayed they wer with trewe-love flour, Of stones bryght of hewe, Wyth carbankull and safere, Kasydonys and onyx so clere, Sette in golde newe, Deamondes and rubyes, And other stones of mychyll pryse, And menstrellys with her gle. "In that other korner was dyght, Trystram and Isowde so bryght, That semely wer to se, And for they loved hem ryght, As full of stones ar they dyght, As thykke as they may be, Of topase and of rubyes, And other stones of myche pryse, That semely wer to se, With crapawtes and nakette, Thykke of stones ar they sette, For sothe as y say the. "In the thyrdde korner, with gret honour, Was Florys and dame Blawncheflour, As love was hem betwene, For they loved wyth honour, Purtrayed they wer with trewe-love-flower, With stones bryght and shene. Ther wer knyghtes and senatowres, Emerawdes of gret vertues, To wyte withouten wene, Deamondes and koralle, Perydotes and crystall, And gode garnettes bytwene.