"Alors le duc Naymes, & tres tous les Barons, s'en retournerent au palais avec le Roy, lequel s'assist sur un banc dore de fin or, & les Barons tous autour de luy. Si commanda qu'on luy amenast Huon, lequel il vint, et se mist a genoux devant le roy, ou luy priant moult humblement que pitie & mercy voulsist avoir de luy. Alors le roy le voyant en sa presence luy dist: Huon puisque vers moy veux estre accorde, si convient que faciez ce que je vous or donneray. Sire, ce dist Huon, pour obeir a vous, il n'est aujourd'huy chose en ce monde mortel, que corps humain puisse porter, que hardiment n'osasse entreprendre, ne ia pour peur de mort ne le laisseray a faire, & fust a aller jusques a l'arbre sec, voire jusques aux portaux d'enfer combattre aux infernaux, comme fist le fort Hercule: avant qu'a vous ne fusse accorde. Huon, ce dist Charles, je cuide qu'en pire lieu vous envoyeray, car, de quinze messages qui de par moy y ont este envoyez, n'en est par revenu un seul homme. Si te diray ou tu iras, puis que tu veux qui de toy aye mercy, m'a volonte est, qu'il te convient aller en la cite de Babylonne, par devers diray, & gardes que sur ta vie ne face faute, quand la seras venu tu monteras en son palais, la ou tu attendras l'heure de son disner & que tu le verras assis a table. Si convient que tu sois arme de toutes armes, l'espee nue au poing, par tel si que le premier & le plus grand baron que tu verras manger a sa table tu luy trencheras le chef quel qu'il soit, soit Roy, ou Admiral. Et apres ce te convient tant faire que la belle Esclarmonde fille a l'Amiral Gaudisse tu fiances, & la baises trois fois en la presence de son pere, & de tous sous qui la seront presens, car je veux que tu scaches que c'est la plus belle pucelle qu'aujourd'huy soit en vie, puis apres diras de par moy a l'Admiral qu'il m'envoye mille espreuiers, mille ours, mille viautres, tous enchainez, & mille jeune valets, & mille des plus belles pucelles de son royaume, & avecques ce, convient _que tu me rapportes une poignee de sa barbe, et quatre de ses dents machoires_. Ha! Sire, dirent les Barons, bien desirez sa mort, quant de tel message faire luy enchargez, vous dites la verite ce dit le Roy, car si tant ne fait que j'aye la barbe & les dents machoires sans aucune tromperie ne mensonge, jamais ne retourne en France, ne devant moi ne se monstre. Car je le ferois pendre & trainer. Sire, ce dit Huon, m'avez vous dit & racompte tout ce que voulez que je face. Oui dist le Roy Charles ma volonte est telle, si vers moy veux avoir paix. Sire ce dit Huon, au plaisir de nostre Seigneur, je feray & fourniray vostre message."