[13] This passage was an abridgment from one in _Le Quadrilogue Invectif_ of Alain Chartier: which is as follows: "Toutes anciennes escriptures sont plaines de mutations, subversions, et changemens de Royaulmes et des Principaultez. Car comme les enfans naissent et croissent en hommes parfaitz, et puis declinent à vieillesse et à mort; ainsi ont les Seigneuries leur commencement, et leur accroissement, et leur declin. Où est Ninive la grant cité, qui duroit trois journées de chemin? Qu'est devenue Babiloine, qui fut edifiée de matiere artificieuse pour plus durer aux hommes, et maintenant est habitée de serpens? Que dira l'en de Troye la riche et tres renommée? Et de Ylion le chastel sans per, dont les portes furent d'ivoire, et les colonnes d'argent; et maintenant à peine en reste le pié des fondemens, que les haulx buissons forcloent de la veue des hommes? Thebes qui fut fondée de Cadmus le fils de Agenor, et la plus peuplée de dessus la terre pour son temps: en laquelle part pourroit en trouver tant de reliques de son nom, que gens se puissent monstrer nez de sa semence? Lacedemoine, dont les loix vindrent à diverse nations, desquelles encores nous usons, ne peut oncques tant estroictement garder les loix de Licurgus le doicturier, qui furent faictes pour sa perpetuation, que sa vertu ne soit extaincte et aneantie. Athenes fontaine de sapience, et source des haultes doctrines de philosophie, n'est elle pas en subversion, et les ruisseaulx de son escole taris et asseichez? Carthage la batailleresse, qui domptait les elephans à batailler, et qui jadis fut tant redoubtée aux Romains, où a elle tourné sa grant glorie, sinon en la cendre du feu où elle fut arse et embrasée? Mais parlons de Romme, qui fut derreniere en souveraine majesté, et excellente en vertu. Et notons bien la parolle de Lucan, qui dit que de elle mesme par sa pesanteur elle decheut. Car les trops pesans faiz font les plus griefues cheoistes. Par ceste maniere chascune à sa tour et en son ordre se changent, rebaissent, ou soubvertissent les eureuses fortunes, et le bruit des Royaulmes. Ainsi comme la Monarchie du monde et la dignité du Souverain Empire fut jadis translatée des Assiriens aux Persans, des Persans aux Grecz, des Grecz aux Rommains, et des Rommains es mains des François et des Germains."