Therfor, alle ye lovyng liege men, bothe youre noble alliaunces and frendis, levithe suche idille lamentacions, put away thoughte and gret pensifnes of suche lamentable passions and besinesse, and put ye hem to foryetefulnesse. And doo not away the recordacion of actis and dedis in armes of so many famous and victorious Kingis, Princes, Dukis, Erles, Barounes, and noble Knightis, as of fulle many other worshipfulle men haunting armes, whiche as verray trew martirs and blissid souls have taken theire last ende by werre; {4} some woundid and taken prisonneres in so just a title and conquest uppon youre enheritaunce in Fraunce and Normandie, Gasquyn and Guyen; and also by the famous King and mighty Prince king Edward the thrid, first heriter to the said Royaume of Fraunce, and by Prince Edwarde his eldist son, and alle his noble bretherin, [who] pursued his title and righte be force of armes, as was of late tyme sithe the yere of Crist M^l.iiij^cxv. done, and made a new conquest in conquering bothe the saide Reaume of Fraunce and Duche of Normaundie by the Prince of blissid memorie king Harry the v^{the}. Also be the eide of tho thre noble prynces his bretherne and be other of his puissant Dukes and lordis, being lieutenaunt[gh] for the werre in that parties, as it is notorily knowen thoroughe alle Cristen nacyons, to the gret renomme and[86] worship of this Reaume. How every good man of [worshyp yn[87]] armes shulde in the werre be resembled to the condicion of a lion. And therfor, in conclusion, every man in hym silf let the passions of dolours be turned and empressid into vyfnes of here spiritis, of egre courages, of manlinesse and feersnesse, after the condicion of the lion resembled in condicions unto; for as ire, egrenesse, and feersnesse is holden for a vertu in the lion, so in like manere the said condicions is taken for a vertue and renomme of worship to alle tho that haunten armes: that so usithe to be egre, feers uppon his advers partie, and not to be lamentable and sorroufulle after a wrong shewed unto theym. And thus withe coragious hertis putting forthe theire prowes in dedis of armes, so that alle worshipfulle men, whiche oughte to be stedfast and holde togider, may be of one intencion, wille, and comon assent to vapour, sprede out, according to the flour delice, and avaunce hem forthe be feernesse of strenght and power to the verray effect and dede ayenst the untrew reproches of oure auncien adversaries halding uppon the Frenshe partie, whiche of late tyme by unjust dissimilacions, undre the umbre {5} and coloure of trewis and abstinence of werre late hadde and sacred at the cite of Tairs the .xxviij. day of Maij, the yere of Crist of M^l.iiij^cxliiij^{to}. have by intrusion of soche subtile dissimilacion wonne uppon us bethyn v yeres next foloweng withyn the tyme of [the last[88]] trieux the said Reaume and duchees, so that in the meane tyme and sethe contynued forthe the saide trewes from yere to yere, to this land