grete charge and cost, till they had conspired and wrought theire avauntage, as it approvethe dailie of experience. And under this they bring assailours uppon this lande and begynneris of the trewis breking. How the Frenshe partie began firste to offende and brake the Trewis. [Sidenote: Tempore Regis H. vj^{th}.] First by taking of youre shippis and marchaundises upon the see, keping men of noble birthe undre youre predecessoure obedience and divers other true lieges men prisoneris under arest, as that noble and trew knight ser Gilis the Duke is son of Bretaine, whiche for his grete trouthe and love he hadde to this youre Royaume warde, ayenst all manhode ungoodely entretid, died in prison. And also before the taking of Fugiers ser Simon Morhier knight, the provost of Paris, a lorde also of youre partie and chief of the Kingis counceile, take prisoner by Deepe and paieng a grete raunson or he was deliverid. And sone after one Mauncelle a squier, comyng fro Rone, with .xx. parsones in his company, to Deepe, pesibly in the monythe of Januarij next before the taking of Fugiers, were in Deepe taken prisoneris wrongfullie undre the umbre of trewis. And sithen the lord Faucomberge take prisoner by subtile undew meanys of a cautel taken under safconduct of youre adversarie at Pountelarge the xv day of Maij, the yere of Crist M^l.iiij^cxlix. And also the said forteresse of Pountlarge take the said day be right undew meanys taken uppon the said lorde Faucomberge contrarie to the said trewis, {6} forging here colourable matieris in so detestable unjust quarellis. For reformacion of whiche gret injuries conspired, shewed, and doone, alle ye put to youre handis to this paast and matier. Comythe therfor and approchen bothe kyn, affinitees, frendis, subgectis, allies, and alle wellewilleris. Now at erst the irnesse be brennyng hote in the fire thoroughe goode courage, the worke is overmoche kindelid and begonne, thoroughe oure dulnesse and sleuthe slommering many day, for be the sheding of the bloode of good cristen people as hathe be done in youre predecessours conquest that now is lost: is said be the wordis of Job: Criethe and bewailethe in the feelde, frendis and kyn, take heede pitously to your bloode. A question of grete charge and wighte,[89] meoved first to be determyned, whethir for to make werre uppon Cristen bloode is laufulle. [Sidenote: 1: p^{a}] [Sidenote: 2: ij^{da}] [Sidenote: 3: iij^{d}]