¶ And iff ther be the thride brodyr then he shaƚƚ beere hys faderis armys with the same labellis and a bordure of an other colowre to the differans of hys brothyr as it shaƚƚ be shewyt ī thys scochon next suyng [Illustration: Cote Armour] ¶ And the chyldyr of thoos men shaƚƚ beere theyr dyfferans not in theyr faderis armys, bot in borduris and dyuysionys dyu̇se. ¶ And like as the chylder of the secunde brodyr beryng iij. labellis ar dyuydyt and dyfferit: by theye signys and theyr borduris. So the chylder of the thride broder beryng .iiij. labellis: bere the same armys that theye fader did &̄ also mony labellis. And they ar dyfferit by theyr signys and theyr borduris as afore is rehersit: and dyu̇se othyr. as oder while a Lyon raumpyng oon parte reed an othdr blakke. Now certanly of aƚƚ the signys the wich ar founde ī armys as of flowris leuys and other merueƚƚys tokenys I can not declare here: ther be so mony. Bot ye shaƚƚ knaw generally that for aƚƚ tharmys the wich lyghtly any man has seen ī his days: ye haue rules sufficient as I be leue. to dyscerne and blase any of theym: and it be so that ye be not in yowre mynde to hasty or to swyfte in the dyscernyng. Ner ye may not ouerryn swyftly the forsayd rules. bot dyligently haue theym in yowre mynde. and be not to fuƚƚ of consaitis. For he that wiƚƚ hunt ij haris ī oon owre: or oon while oon. an other while an other lightly he losys both. Therfore take heede to the rules. Iff so be that they be not a generaƚƚ doctrine: yet shaƚƚ thai profecte for thys sciens gretly. Merke ye wele theys questionys here now folowyng. Bot now to a question I wiƚƚ procede. and that is thys Whethyr tharmys of the grauntyng of a prynce or of other lordys ar better or of sych dignyte: as armys of a manis propur auctorite take. when that it is leefuƚƚ to eueri nobuƚƚ man to take to hym armys at his plesure For the wich question it is to be knaw that .iiij. maner of wyse we haue armys ¶ The first maner of wyse we haue owre awne armis the wiche we beer of owre fadyr or of owre moodyr or of owre predycesessoris. the wych maner of beryng is comune and famus in the wych I wiƚƚ not stonde long. for that maner is best ṗuyt ¶ The secunde maner we haue armys by owre merittys as verey playnly it apperith by the addicion of tharmys of Fraūce to tharmys of Englonde getyn by that moost nobuƚƚ man prynce Edward the first getyn sone of Kyng Edward the thride y^t tyme Kyng of Englond after the takyng of Kyng Iohn̄ of Fraunce ī the bateƚƚ of Peyters. The wich certan addicion wos lefuƚƚ and rightwysli doon. and on the saame maner of whyse myght a poore archeṙ haue take a prynce or sum nobuƚƚ lorde. &̄ so tharmys of that prysoner: by hym so take rightwisly he may put to hym and to his hayris. ¶ On the thride maner of whise whe haue armys the wich we beere by the grauntyng of a prynce or of sum other lordys.