Ther be .iiij. diuerse maner of gentilmen. Oon his a gentylman of awncetreys: wich muste nedis be a gentilman of blode. Ther be .iij. gentilmen of Cotearmure and not of blode Oon is a gentylman of Cotarmure of the kynges bagge. that is to say his deuice by an herawd Igouen̄. An other gentilman of Cotarmure is and not of blode a kyng geuyng a lordshipp to a yoman vnder his seaƚƚ of patent to hym and to his eyrys for euer more he may were a Cotarmure of the same lordshipp The thride his a yoman cristenyd yif he kiƚƚ a gentylman sorsyn he may were the sarsinys Cotarmure and noo sarsyn a sarsynis cotarmure nethir cristennys cotarmure bi feghtyng in noo wyse Yit sum men say that a cristen man ouercomyng a cristen man feghtyng in the list shaƚƚ bere the cotarmure of him that is ouer comyn. Or if a souereyn kyng make of a yoman a knyght that same knyght is a gentylman of blode by the royalte of the kyng and of knyghthood ¶ A gentẏlman spirituall ¶ Ther is a gentylman a churle sone a preste to be made and that is a spirituaƚƚ gentylman to god and not of blode. Butt if a gentylmannys sone be made preste he is a gentilman both spirituaƚƚ and temperaƚƚ. Criste was a gentilman of his moder behalue and bare cotarmure of aunseturis. The .iiij. Euangelist berith wittenese of Cristis warkys in the gospeƚƚ with aƚƚ thappostilles. They were Iewys and of gentylmen come by the right lyne of that worthy ꝯqueroure Iudas machabeus bot that by succession of tyme the kynrade feƚƚ to pouerty. after the destruccion of Iudas Machabeus and then they feƚƚ to laboris &̄ ware calde no gentilmen. and the .iiii. doctoris of holi chirch Seynt Ierom Ambrose Augustyn and Gregori war gentilmen of blode and of cotarmures ¶ Also the diuisionẏs of cotarmuris be .ix. thatt is to witt .v. perfẏte and .iiii. vnperfẏte Ther be .ix. dyuisionis of cotarmures .v. perfite & .iiii. vnperfite. The .v. perfite be theys. Termynaƚƚ Collateraƚƚ Abstrakte Fixaƚƚ and Bastard. ¶ Diferens Enbordẏng ¶ Termynaƚƚ is calde in armys aƚƚ the bretheren of right lyne hethir by fadre or by modre may bere the right heyris cotarmure with a differens calde Enbordyng ¶ Dẏferans Iemews ¶ Collateraƚƚ is calde in armys the sonnys of the bretheren of the right heyre beryng the cotarmuris of theyr faderis with a dyfferans Iemews ¶ Diferens molet ¶ Fixaƚƚ in armys is calde the thirde degre by the rightlyne from the right heyre by line male. thay may bere there faderis cote armure with a differans molet Diferans countertreuis ¶ The bastarde of fixaƚƚ shaƚƚ bere his faderis cotarmure counturtreuys. that is to say what so euer he berith in his felde he shaƚƚ bere in the colowris dyuerse and no more How ther be .iiii. cotarmurẏs imperfite and be borẏn wẏth owte diferans