Anent the complaint made be David Fargusone, upon Mr James M‘Gill, Clark of Register, to the young Laird of Rossythe, that against the acts of the Kirk they causet burye the umquhill Laird of Rossythe in the Kirk of Dumfermling, albeit the said David made them foirseen of the said act; The Kirk ordaynit John Durie to warne the Clark Register to answer heirto, the first day of May next to come. Ordayns the brethrene to wait on my Lord Regent’s Grace answer, to make sute for Mr John Davidson’s libertie to come in the countrie, for his favour, when he likes to come. The brethrene appoyntit to collect the heids of Policie presentit of before, reportit the same collectit in order, and digestit in an body; and all men requyrit that had good reasone to argument, to propone, to offer them thereto. Thrie heids were callit in doubt; ane _de Diaconatu_, ane uther _de Jure Patronatus_, the third _de Divortiis_, wherein they were not resolvit nor satisfiet. As to the rest, nothing was thocht in the contrair, nor proponit. Thir thrie heids standing in contraversie, and disput _in utramque partem_, yet farther disputation was reservit till the morne, to any man that likit to take the pairt of reasoning upon him against the saids heids. The Commissioners appoyntit to await upon my Lord Regent’s Grace’s answer, report, because they had no commission in wreit, his Grace gave no answer to them. The Clark Register beand present, declareit that the Proveist and Baillies of Dumfermling agriet to burie the said Laird of Rossythe in the Kirk; that he was not the causer thereof, submittand himselfe allwayes to the judgement of the Kirk, if any offence be found done by him.