Anent the doubt movit, if it be leisum to any towne or citie quhare there is ane Universitie, and ane pairt of the parochine of the said towne lyand to landwart, but thair consents and votes, to elect ane minister to the haill paroche and universitie, pretending the priviledge of ane old use and custome: The Kirk hes votit thereto _negando_, that it is not leisome so to doe. Sessio 6. Anent the heid read afternoone, referrit to farther deliberatione: the Moderator declairit that the matter in a pairt being reasonit in privie conferrence, they had pennit two articles, quhilk they thocht good the Assembly sould judge upon, and to vote to the same if they find it expedient; quhilk being read and advysit with, the haill brethren gave consent thereto; of the quhilks articles this is the tennor: It is found that all such as the Scripture appoynts Governours of the Kirk of God, as, namely, Pastors, Doctors, and Elders, may convene to Generall Assemblies and vote in ecclesiasticall matters; and all uthers that hath any sute or uther things to propone to the Assemblie may be there present, to giue in their sutes, and propone things profitable to the Kirk, and hear reasoning, but shall not vote: 2. There are four offices ordinare sett down to us be the Scripture, to witt, Pastors, Doctors, Elders, and Deacones, and the name of a Bischop ought not to be taken as it hath been in Papistrie; but it is commone to all pastores and ministers. Mr David Cunninghame, Bischop of Aberdeene, is ordainit to be summoned before the Presbytrie of Glasgow, for abusing his bodie in adulterie with Elspeth Sudderland. Anent Visitation; The Kirk, after reasonyng, hes fund that it is lawfull and necessare at this tyme, and the forme thereof continewand, and the rest of the circumstances thereof heirafter to be reasoned. Sessio 7. Anent the heids of Visitatione, and circumstances left to farther consideratione: At the desyre of my Lord Privie Seall, the Assembly directit Mrs Robert Pont, Andrew Melvill, Thomas Blackburne, Nicoll Dalgleische, Andrew Polwant, and Thomas Buchanane, to conferr with the King’s Majestie’s Commissioners thereanent, and such others matters as shall be communicat unto them. In presence of the haill Assembly, compeirit my Lord Maxwell, and declareit, that be the King’s Majestie’s command, he compeirit before the said Assemblie, as he had found cautione to that effect before the Counsell to compeare before them this day; and, in respect of his obedience, protestit his cautioner sould be fred, and took instruments upon his compearance and protestatione. The Assembly, in respect they knew not the cause of his compearance, nor the King’s Majestie’s command thairanent, desyreit him to be present the morne before noone; and, in the mean tyme, craving his Heines’ Commissioners knawledge heiranent. The saids Commissioners protestit that his cautioner sould no wayes be free, qwhill his Majestie’s minde be returned be them to the Assemblie.