EHEU, ver breve et invidum! Eheu, floriduli dies! Ergo curritis improba, Et quae nunc face fulgurat, Dulcis forma tenacibus Immiscebitur infimae: Heu, noctis nebulis; amor Fallax, umbraque somnii. Quin incumbitis; invida Sic dictat colus, et rota Cani temporis incito Currens orbe volubilis. O deprendite lubricos Annos; et liquidum jubar Verni sideris, ac novi Floris fulgura, mollibus Quae debetis amoribus, Non impendite luridos In manes avidum et Chaos. Quanquam sidereis genis, Quae semper nive sobria Sinceris spatiis vigent, Floris germine simplicis, Flagrant ingenuae rosae: Quanquam perpetua fide Illic mille Cupidines, Centum mille Cupidines, Pastos nectarea dape, Blandis sumptibus educas; Istis qui spatiis vagi, Plenis lusibus ebrii, Udo rore beatuli, Uno plus decies die Istis ex oculis tuis, Istis ex oculis suas Sopitas animant faces, Et languentia recreant Succo spicula melleo: Tum flammis agiles novis Lasciva volitant face, Tum plenis tumidi minis, Tum vel sidera territant, Et coelum et fragilem Jovem: Quanquam fronte sub ardua Majestas gravis excubans, Dulces fortiter improbis Leges dictat amoribus: Quanquam tota, per omnia, Coelum machina praeferat, Tanquam pagina multiplex Vivo scripta volumine, Terris indigitans polos. Et compendia siderum: Istis heu tamen heu genis, Istis purpureis genis, Oris sidere florido, Regno frontis amabili; Mors heu crastina forsitan Crudeles faciet notas, Naturaeque superbiam Damnabit tumuli specu. TRANSLATION. THE BEAUTIFUL NOT LASTING.