Ont comparu pardevant Nous Jehan Jullien Depupet notaire ducal et Vichastellain pour son Altesse au lieu de Sainct Jullien et Montdenix honnestes Francoys et Catherin Aimenetz conscindicz dudict lieu maistres Jehan Modere Andre Guyons Pierre Depupet notaires ducaulx maistre Reymond Thabuys honnestes Claude Charvin Jehan Prunier Claude Fay Françys Humbert et Vuilland Duc conseilliers dudict lieu avec des manantz et habitantz dudit lieu les deux partyes les troys faisantz le tout tous assembles au son de la cloche au Parloir damon place publicque dudit lieu de Sainct Jullien au conseil general suyvant la publication d’icelluy faicte cejoudhuy mattin a lyssue de la parocchielie dudit lieu et au lieu ce fere accoustume par Guilliaume Morard metral dudict lieu ce a Nous rapportant disantz les susnommez scindicz comme au proces pas eulx au nom de ladicte communaulte intenre et poursuyvy contre les Animaulx brutes vulgairement appelez Amblevins pardevant le Seigneur Reverendissime Evesque et Prince de Maurianne ou son Official est requis et necessayre syvant le conseil a eulx donne par le sieur Fay leur advocat de ballier ausdictz Animaulx place et lieu de souffizante pasture hors les vigniables dudict lieu de Sainct Jullien et de celle qu’il y en puissent vivre pour eviter de manger ny gaster lesdictes vignes. A ceste cause ont tous les susnommes et aultres y assembles delibere leur offrir la place et lieu appelle la Grand Feisse ou elle se treuvera souffizante pour les pasturer et que le sieur advocat et procureur diceulx Animaux se veuillent contempter laquelle place est assize sur les fins dudict Sainct Jullien audessus du village de Claret jouxte la Combe descendant de Roche noyre passant par le Crosset du levant la Combe de Mugnier du couchant ladicte Roche noyre dessus la Roche commencant a la Gieclaz du dessoubz laquelle place sus coufinee centient de quarent a cinquante sesteries ou environ peuplee et garnye de plusieurs espresses de boes plantes et feuillages comme foulx allagniers cyrisiers chesnes planes et aultres arbres et buissons oultre lerbe et pasture qui y est en asses bonne quantité a laquelle les susnommes au nom de ladicte communaulte lon offre ny prendre chose que ce soyt moing permettre a leur sceu y es tre prins et emporte chose que soyt dans lesdictz confins soyt par gens ou bestes saufz toutteffoys que ou le passaige des personnes y seroyt necessayre a quelque lieu ou endroit ou lon ne puisse passer par ledict lieu sans fere aulcung prejudice a la pasture desdicts Animaulx comme aussi dy pouvoir tirer mynes de colleurs et aultres si alcune en y a dequoy lesdictz Animaulx ne se peuvent servir pour vivre et par ce que le lieu est une seure retraicte en temps de guerre ou aultres troubles par ce quelle est garnye des fontaynes qui aussi servira ausdictz Animaulx se reservent sy pouvoir retirer au temps susdict et de necessite et de leur passer contract de ladicte piece aux conditions susdictes tel que sera