A tous ceux qui ces presentes lettres verront, Jean Sondar, Lieutenant du Bailly du temporel de l’église & abbaye nôtre Dame de Beauprés de l’ordre de Cisteaux, pour venerables & discretes personnes & mes tres-honorez seigneurs, messeigneurs les religieux abbé & convent de ladite abbaye, salut. Comme à la requeste du procureur de mesdits seigneurs, & par leur justice temporelle qu’ils ont en leur terre & seigneurie du Caurroy eût été nagaires prins & mis en la main d’icelle leur justice ung thorreau de poil rouge, appartenant à Jean Boullet censier & fermier de mesdits seigneurs, demeurant en leur maison & cense dudit Caurroy, lequel thorreau étant aux champs & sur le territoiiere d’icelle église, auroit par furiosité occis & mis à mort un joine fils, nommé Lucas Dupont, de l’âge de quatorze à quinze ans, ou environ, serviteur dudit censier, lequel il avoit mis à la garde de ces bestes à corne, entre lesquelles estoit ledit thorreau. Duquel thorreau ledit procureur de mesdits seigneurs requeroit la justice estre faite, & qu’il fut executé jusqu’à mort inclusivement par la justice de mesdits seigneurs pour occasion de icelui crimme de omicide & de la detestation d’iceluy. Sur quoy enqueste & information eussent été faites de la forme & maniere iceluy homicide, par laquelle ledit procureur nous eust requis sur ce luy estre fait droit. Savoir faisons que veu laditte enqueste & information & sur tout en conseil & advis, nous par nostre sentence & jugement, avons dies & jugié, que pour raison de l’omicide, dont dessus est touchié, fait par ledit thorreau en la personne d’iceluy Lucas, & pour la detestation du crime d’iceluy homicide, ledit thorreau nommé confisqué à mesdits seigneurs sera executé jusques à mort inclusivement par leurdite justice, & pendu à une fourche ou potence es mettes de leurdite terre & seigneurie dudit Caurroy, aupres du lieu ou solloit estre assise la justice. Et ad ce le avons condamné & condamnons. En tesmoing de ce avons mis nostre scel à ces lettres qui furent faites & pronunchiés audit lieu du Caurroy en la presence de Guillaume Gave du Mottin, Jehan Custien l’aisné, Jehan Henry, Jehan Boullet, hommes & subjets de mesdits seigneurs, Jehan Charles, & Clement le Carpentier, & plusieurs autres les seizieme jour de May l’an mil quatre cens quatre-vingt-dix-neuf. Ainsi signé, Ileugles, ad ce commis. [The original records of this trial for homicide are in the archives of the Abbey of Beaupré. Vide _Voyage Littéraire de deux Religieux Benedictins de la Congregation de St. Maur_. Seconde Partie, pp. 166-7. Paris, 1717. The Benedictins were Dom. Edmond Martene and Dom. Ursin Durand.] R Scene from Racine’s comedy _Les Plaideurs_, in which a dog is tried and condemned to the galleys for stealing a capon.