“A' did naethin,' an' nae man can dae muckle in that waesome tribble. It aye taks the cleverest laddies an' the bonniest lassies; but a' never hed a heavier hert than when a' saw tochty man ever turned over secrets in the Geordie's face that aifternoon. There's ane fechtin' decline.” “Ye mak ower little o' yir help, doctor; it wes you 'at savit him frae pain an' keepit his mind clear. Withoot you he cudna workit on tae the end or seen his freends. A' the Glen cam up tae speir for him, and say a cheery word tae their scholar. “Did a' ever tell ye that Posty wud gang roond a gude half mile oot o' his road gin he hed a letter for Geordie juist tae pit it in his hands himsel? and Posty 's a better man sin then; but wha div ye think wes kindest aifter Domsie an' yersel?” “Wha wes't?” but Maclure lifted his head, as if he had already heard the name. “Ay, ye 're richt,” answering the look of his friend, “Drumsheugh it wes, an' a' that simmer he wes sae gentle and thochtfu' the Glen wudna hae kent him in oor gairden. “Ye've seen him there yersel, but wud ye believe't, he cam three times a week, and never empty-handed. Ae day it wud be some tasty bit frae Muirtown tae gar Geordie eat, another it wud be a buke the laddie had wantit tae buy at College, an' a month afore Geordie left us, if Drumsheugh didna come up ae Saturday wi' a parcel he had gotten a' the way frae London. “'Whatna place is this, Geordie?' an' he taks aff the cover an' holds up the picture. It wud hae dune ye gude tae hae seen the licht in the laddie's een. 'Athens,' he cried, an' then he reached oot his white hand tae Drumsheugh, but naethin' wes said. “They were at it the hale forenoon, Geordie showin' the Temple the Greeks set up tae Wisdom, an' the theatre in the shadow of the hill whar the Greek prophets preached their sermons; an' as a' gied oot an' in, Geordie wud read a bonnie bit, and Domsie himsel cudna hae been mair interested than Drumsheugh. The deein' scholar an' the auld fairmer....” “Ay, ay,” said Maclure.. “Ae story Geordie telt me never ran dry wi' Drumsheugh, an' he aye askit tae hear it as a treat till the laddie grew ower sober--aboot twa lovers in the auld days, that were divided by an airm o' the sea, whar the water ran in a constant spate, and the lad hed tae sweem across tae see his lass. She held a licht on high tae guide him, an' at the sicht o't he cared naethin' for the danger; but ae nicht the cauld, peetiless water gied ower his head, and her torch burned oot. Puir faithfu' lass, she flung hersel into the black flood, and deith jined them where there's nae partin'.” “He likit that, did he?” said Maclure, with a tone in his voice, and looking at Marget curiously. “Best o' a' the ancient things George gied him in the gairden, an' ae day he nearly grat, but it wesna for their deith.