15 In the midst of Clyde's water, There stands a yird-fast stone; There he leant him ower his saddle-bow, And set that lady on, And brought her to the other side, Then set her down again. 16 'O see ye not yon goodly towers, And gowd towers stand sae hie? There is a lady in yonder bower Will sinder you and me.' 17 'I wish nae ill to your lady, She neer wishd nane to me; But I wish the maid maist o your love That drees far mair for thee. 18 'I wish nae ill to your lady, She neer comes in my thought; But I wish the maid maist o your love That dearest hae you bought.' 19 Four an twenty gay ladies Led Willie thro bower and ha; But the fairest lady amo them a' Led his horse to the sta. 20 Four an twenty gay ladies Were a' at dinner set; Burd Helen sat at a by-table, A bit she coudna eat. 21 Out it spake her Dow Isbel, A skilly dame was she: 'O whare got ye this fine foot-page Ye've brought alang wi thee? 22 'Sometimes his colour waxes red, Sometimes it waxes wan; He is liker a woman big wi bairn Nor be a waiting man.' 23 'Win up, win up, my boy,' he says, 'At my bidding to be, And gang and supper my gude steed, See he be litterd tee.' 24 Then she is into stable gane, Shut tee the door wi a pin, And even amang Willie's horse feet Brought hame her bonny young son. 25 When day was gane, and night was come, And a' man bound for bed, Sweet Willie and Dow Isbel In ae chamber were laid. 26 They hadna been well lien down, Nor yet well faen asleep, Till up it wakens Sweet Willie, And stood at Dow Isbel's feet. 27 'I dreamd a dreary dream this night, I wish it may be for guid; Some rogue hae broke my stable-door, And stown awa my steed. 28 'Win up, win up now, Dow Isbel, At my bidding to be, And ye'll gae to my stable-door, See that be true or lie.' 29 When she gaed to the stable-door, She heard a grievous groan; She thought she heard a bairn greet, But and a woman's moan. 30 'When I was in my bigly bower, I wore but what I would; This night I'm lighter 'mang Willie's horse feet, I fear I'll die for cold. 31 'When I was in my bigly bower, I wore gold to my tae; This night I'm lighter mang Willie's horse feet, And fear I'll die or day. 32 'When I was in my bigly bower, I wore scarlet and green; This night I'm lighter mang Willie's horse feet, And fear I'll die my lane.' 33 Dow Isbel now came tripping hame, As fast as gang coud she; 'I thought your page was not a man, Ye brought alang wi thee.