2 ‘O whare is this Hazelgreen, maid? That I may him see.’ ‘He is a ticht and a proper man, Lives in the South Cuntree. His shoulders broad, his arms lang, O he’s comely to be seen!’-- But ay the tears they drappit doun For Jock o Hazelgreen. 3 ‘Will ye gang wi me, fair maid? . . . . . . . And I’ll marry ye on my son,’ . . . . . . . ‘Afore I’d go along wi you, To be married on your son, I’d rather choose to stay at hame, And die for Hazelgreen.’ 4 But he has tane her up behind, And spurred on his horse, Till ance he cam to Embro toun, And lichted at the corss. He bought to her a petticoat, Besides a handsome goun; He tied a silver belt about her waist, Worth thrice three hunder pund. 5 And whan he cam to Hazelyetts, He lichted doun therein; Monie war the brave ladies there, Monie ane to be seen. She lichted doun amang them aw, She seemed to be the queen; But ay the tears they rappit doun For Jock o Hazelgreen. 6 Young Hazelgreen took her by the hand And led her out and in: Said, Bonnie lady, for your sake, I could be baith rent and rien; I wad gie aw my lands and rents, Tho I had kingdoms three, If I could hae the great pleasure To enjoy thy fair bodie. 7 ‘No more of this,’ his father said, ‘Of your mourning let abee; I brought the damsel far frae hame, She’s thrice as wae for thee. The morn is your bridal-day, The nicht is your bridal-een, And I’ll gie you aw my lands and rents, My pleasing son, Hazelgreen.’ C Kinloch MSS, I, 319. 1 As I gaed out in a May morning, Afore that I could see, And there I heard a pretty fair may Making sweet melodie. She was making sic melodie, I wonderd what she could mean; But ay she sang and sang about Sweet John o Hazelgreen. 2 ‘O what na man is Hazelgreen? Fair may, pray tell to me.’ ‘He is a stout and a tall young man As in a’ the South Countrie. He is a stout and a tall young man, And comely to be seen; But still O I maun weep and wail For John o Hazelgreen.’ 3 ‘Hold your tongue, fair maid,’ he says, ‘And let your weeping alane; I’ll marry you to my eldest son, And you shall be ca’d my dame.’ 4 He has tane her on ahint him, And fast he spurred the steed; For Edinbro town he there was bound, Where they soon came wi speed. 7 He’s tane her to the Luckenbooths, Coft her a braw new gown, A handsome feather for her hat, And a pair o silken shoon. 8 He has tane the fair may up again, And fast awa rode he; For Hazelgreen now he was bound, Her lodging there to be.