‘It’s no possible, Girzy, for ye ken Mr. and Mrs. Givan are to be here next week with their dochter, Miss Peggy, and I would fain hae them to see an ony thing could be brought to a head between her and our Geordie. He’s noo o’ a time o’ life when I would like he were settled in the world, and amang a’ our frien’s there’s no a family I would be mair content to see him connected wi’ than the Givans, who are come o’ the best blood, and are, moreover, o’ great wealth and property.’ ‘Weel, if e’er there was the like o’ you, gudeman,’ replied the Leddy, delighted with the news; ‘an ye were to set your mind on a purpose o’ marriage between a goose and a grumphie, I dinna think but ye would make it a’ come to pass. For wha would hae thought o’ this plot on the Givans, who, to be sure, are a most creditable family, and Miss Peggy, their dochter, is a vera genty creature, although it’s my notion she’s no o’ a capacity to do meikle in the way o’ throughgality. Howsever, she’s a bonny playock, and noo that the stipend ye alloo’t to Watty is at an end, by reason of that heavy loss which we all met wi’ in his wife, ye’ll can weel afford to help Geordie to keep her out in a station o’ life; for times, gudeman, are no noo as when you and me cam thegither. Then a bein house, and a snod but and ben, was a’ that was lookit for; but sin genteelity came into fashion, lads and lasses hae grown leddies and gentlemen, and a Glasgow wife saullying to the kirk wi’ her muff and her mantle, looks as puckered wi’ pride as my lord’s leddy.’ Claud, who knew well that his helpmate was able to continue her desultory consultations, as long as she could keep herself awake, here endeavoured to turn the speat of her clatter into a new channel, by observing, that hitherto they had not enjoyed any great degree of comfort in the marriages of their family. ‘Watty’s,’ said he, ‘ye see, has in a manner been waur than nane; for a’ we hae gotten by’t is that weakly lassie bairn; and the sumph himsel is sae ta’en up wi’t, that he’s a perfect obdooracy to every wis o’ mine, that he would tak another wife to raise a male-heir to the family.’ ‘I’m sure,’ replied the Leddy, ‘it’s just a sport to hear you, gudeman, and your male-heirs. What for can ye no be content wi’ Charlie’s son?’ The countenance of Grippy was instantaneously clouded, but in a moment the gloom passed, and he said,-- ‘Girzy Hypel, t’ou kens naething about it. Will na Watty’s dochter inherit the Divethill by right o’ her father, for the Plealands, and so rive the heart again out o’ the Kittlestonheugh, and mak a’ my ettling fruitless? Noo, what I wis is, that Geordie should tak a wife to himsel as soon as a possibility will alloo, and if he has a son, by course o’ nature, it might be wised in time to marry Watty’s dochter, and so keep the property frae ganging out o’ the family.’