‘Me cut him off frae his inheritance! When my grandfather brake on account o’ the Darien, then it was that he lost his inheritance. He’ll get frae me a’ that I inherited frae our forbears, and may be mair; only, I’ll no alloo he has ony heritable right on me, but what stands with my pleasure to gie him as an almous.’ ‘But consider, he’s your own firstborn?’-- ‘Weel, then, what o’ that?’ ‘And it stands with nature surely, Mr. Walkinshaw, that he should hae a bairn’s part o’ your gear.’ ‘Stands wi’ nature, Mr. Keelevin? A coat o’ feathers or a pair o’ hairy breeks is a’ the bairn’s part o’ gear that I ever heard o’ in nature, as the fowls o’ the air and the beasts o’ the field can very plainly testify.--No, no, Mr. Keelevin, we’re no now in a state o’ nature but a state o’ law, and it would be an unco thing if we did na make the best o’t. In short, ye’ll just get the settlements drawn up as soon as a possibility will alloo, for it does na do to lose time wi’ sic things, as ye ken, and I’ll come in wi’ Watty neest market day and get them implemented.’ ‘Watty’s no requisite,’ said Mr. Keelevin, somewhat thoughtfully; ‘it can be done without him. I really wish ye would think better o’t before we spoil any paper.’ ‘I’m no fear’t about the paper, in your hands, Mr. Keelevin,--ye’ll do every thing right wi’ sincerity,--and mind, an it should be afterwards found out that there are ony flaws in the new deed, as there were in the auld, which the doited creature Gibby Omit made out, I’ll gar you pay for’t yoursel; so tak tent, for your own sake, and see that baith Watty’s deed and mine are right and proper in every point of law.’ ‘Watty’s! what do you mean by Watty’s?’ ‘Have na I been telling you that it’s my wis that the Plealands and the Grippy should be made one heritage, and is na Watty concos mancos enough to be conjunct wi’ me in the like o’ that? Ye ken the flaw in his grandfather’s settlement, and that, though the land has come clear and clean to him, yet it’s no sae tethered but he may wise it awa as it likes him to do, for he’s noo past one-and-twenty. Therefore, what I want is, that ye will mak a paper for him, by the whilk he’s to ’gree that the Plealands gang the same gait, by entail, as the Grippy.’ ‘As in duty bound, Mr. Walkinshaw, I maun do your will in this business,’ said Mr. Keelevin; ‘but really I ken na when I hae been more troubled about the specialities of any settlement. It’s no right o’ you to exercise your authority oure Watty; the lad’s truly no in a state to be called on to implement ony such agreement as what ye propose. He should na be meddled wi’, but just left to wear out his time in the world, as little observed as possible.’