‘Hae, there’s something to help to keep the banes green, but be careful, Charlie, for I doubt ye’ll hae need, noo that ye’re the head o’ a family, to look at baith sides o’ the bawbee before ye part wi’t.’ ‘It’s for a whole hundred pound,’ exclaimed Lady Grippy in an exulting whisper to her daughter-in-law--while the old man, after parting with the paper, turned briskly round to his son, as if to interrupt his thankfulness, and said,-- ‘Charlie, ye maun come wi’ Watty and me on Wednesday; I hae a bit alteration to make in my papers; and, as we need na cry sic things at the Cross, I’m mindit to hae you and him for the witnesses.’ Charles readily promised attendance; and the old people then made their congées and departed. In the walk homeward Claud was still more taciturn than in the morning; he was even sullen, and occasionally peevish; but his wife was in full pipe and glee; and, as soon as they were beyond hearing, she said,-- ‘Every body maun alloo that she’s a well far’t lassie yon; and, if she’s as good as she’s bonny, Charlie’s no to mean wi’ his match. But, dear me, gudeman, ye were unco scrimpit in your talk to her--I think ye might hae been a thought mair complaisant and jocose, considering it was a marriage occasion; and I wonder what came o’er mysel that I forgot to bid them come to the Grippy and tak their dinner the morn, for ye ken we hae a side o’ mutton in the house; for, since ye hae made a conciliation free gratus wi’ them, we need na be standing on stapping-stanes; no that I think the less of the het heart that Charlie has gi’en to us baith; but it was his forton, and we maun put up wi’t. Howsever, gudeman, ye’ll alloo me to make an observe to you anent the hundred pound. I think it would hae been more prudent to hae gi’en them but the half o’t, or ony smaller sum, for Charlie’s no a very gude guide;--siller wi’ him gangs like snaw aff a dyke; and as for his lilywhite-handit madam, a’ the jingling o’ her spinnit will ne’er make up for the winsome tinkle o’ Betty Bodle’s tocher purse. But I hae been thinking, gudeman, noo that Charlie’s by hand and awa, as the ballad o’ ‘Woo’t and Married and a’’ sings, could na ye persuade our Watty to mak up to Betty, and sae get her gear saved to us yet?’