Ðry hadas sindon þe cyðdon gecyðnysse be Criste; þæt is mæigð-had, and wudewan-had, and riht sinscype. Mæden is Cristes modor, and on mægð-hade wunude Iohannes se Fulluhtere, þe embe Crist cydde, and manega oðre to-eacan him. Widewe wæs ðeos Anna, þe we gefyrn ær embe spræcon. Zacharias, Iohannes fæder, wæs wer; ægðer ge he ge his wíf witegodon embe Crist. Þas ðry hadas syndon Gode gecweme, gif hi rihtlice lybbað. Mægð-had is ægþer ge on wæpmannum ge on wífmannum. Þa habbað rihtne mægð-had þa þe fram cild-hade wuniað on clænnysse, and ealle galnysse on him sylfum forseoð, ægðer ge modes ge lichoman, þurh Godes fultum. Þonne habbað hi æt Gode hundfealde mede on ðam ecan life. Widewan beoð þa þe æfter heora gemacan on clænnysse wuniað for Godes lufon: hí habbað þonne syxtigfealde mede æt Gode hyra geswinces. Þa ðe rihtlice healdað hyra ǽwe, and on alyfedum timan, for bearnes gestreone, hæmed begáð, hí habbað þrittigfealde mede for hyra gesceadwisnysse. Se ðe wile his galnysse gefyllan swa oft swa hine lyst, þonne bið he wiðmeten nytenum and na mannum. Be þysum tæhte se apostol Paulus, "Þa ðe wíf habbað, beon hí swilce hí nan nabbon;" forðan ealle hyra unlustas hi sceolon gebetan sylfwylles on þyssum life, oððe unþances æfter ðyssum life; and hí cumað siððan to ðam ecan life mid maran earfoðnysse. Þa men þe beoð butan rihtre ǽwe, and yrnað fram anum to oðrum, nabbað hí nænne dæl ne nane bletsunge mid Criste, buton hí ðæs geswicon and hit gebeton. Uton fon nu on þæt godspel ðær we hit ær forleton. Seo eadige Maria, and Ioseph, ðæs cildes fostor-fæder, {150} gecyrdon to þære byrig Nazareth mid þam cilde; "and þæt cild weox, and wæs gestrangod, and mid wisdome afylled, and Godes gifu wæs on him wunigende." He weox and wæs gestrangod on þære menniscnysse, and he ne behofode nanes wæstmes ne nanre strangunge on þære godcundnysse. He æt, and dranc, and slep, and weox on gearum, and wæs þeah-hwæðere eal his lif butan synnum. He nære na man geðuht, gif he mannes life ne lyfode. He wæs mid wisdome afylled, forþan ðe he is himsylf wisdom, and on him wunað eal gefyllednys þære godcundnysse: lichomlice Godes gifu wunude on him. Micel gifu wæs þæt ðære menniscnysse, þæt he wæs Godes Sunu and God sylf, swa hraðe swa he ongann man to beonne. He wæs æfre God of þam Fæder acenned, and wunigende mid þam Fæder and mid þam Halgan Gaste: hí ðry án God untodæledlic; þry on hadum, and án God on anre godcundnysse, and on anum gecynde æfre wunigende. Se Sunu ana underfeng þa menniscnysse, and hæfde anginn, seðe æfre wæs. He wæs cild, and weox on þære menniscnysse, and þrowode deað sylfwilles, and aras of deaðe mid þam lichaman þe he ær on þrowode, and astah to heofenum, and wunað nu æfre on godcundnysse and on menniscnysse, an Crist, ægðer ge God ge mann, undeadlic, seðe ær his ðrowunge wæs deadlic. He þrowade, ac he ne ðrowað heonon-forð næfre eft, ac bið æfre butan ende, eallswa éce on þære menniscnysse swa he is on þære godcundnysse.