"Se Hælend ferde ofer ða Galileiscan sǽ, þe is gehaten Tyberiadis, and him filigde micel menigu, forðon þe hi {182} beheoldon ða tacna þe hé worhte ofer ða untruman men. Þa astah se Hælend up on ane dune, and þær sǽt mid his leorning-cnihtum, and wæs ða swiðe gehende seo halige Eastertid. Þa beseah se Hælend up, and geseah þæt ðær wæs mycel mennisc toweard, and cwæð to anum his leorning-cnihta, se wæs geháten Philippus, Mid hwam mage we bicgan hláf ðisum folce? Þis he cwæð to fándunge þæs leorning-cnihtes: he sylf wiste hwæt he dón wolde. Ða andwyrde Philippus, Þeah her wæron gebohte twa hund peningwurð hlafes, ne mihte furðon hyra ælc anne bitan of ðam gelæccan. Þa cwæð an his leorning-cnihta, se hátte Andreas, Petres broðor, Her byrð án cnapa fif berene hlafas, and twegen fixas, ac to hwán mæg þæt to swa micclum werode? Þa cwæð se Hælend, Doð þæt þæt folc sitte. And þær wæs micel gǽrs on ðære stowe myrige on to sittenne. And hí ða ealle sæton, swa swa mihte beon fíf ðusend wera. Ða genam se Hælend þa fíf hláfas, and bletsode, and tobræc, and todælde betwux ðam sittendum: swa gelíce eac þa fixas todælde; and hí ealle genoh hæfdon. Þaða hí ealle fulle wæron, ða cwæð se Hælend to his leorning-cnihtum, Gaderiað þa lafe, and hí ne losion. And hi ða gegaderodon ða bricas, and gefyldon twelf wilian mid ðære lafe. Þæt folc, ða ðe ðis tacen geseah, cwæð þæt Crist wære soð witega, seðe wæs toweard to ðisum middangearde." Seo sǽ, þe se Hælend oferferde, getacnað þas andweardan woruld, to ðære com Crist and oferferde; þæt is, he com to ðisre worulde on menniscnysse, and ðis lif oferferde; he com to deaðe, and of deaðe aras; and astah up on ane dune, and þær sæt mid his leorning-cnihtum, forðon ðe he astah up to heofenum, and þær sitt nuða mid his halgum. Rihtlice is seo sǽ wiðmeten þisre worulde, forðon ðe heo is hwíltidum smylte and myrige ón to rowenne, hwilon eac swiðe hreoh and egeful on to beonne. Swa is þeos woruld; hwíltidum heo is gesundful and myrige on to wunigenne, hwilon heo is eac swiðe styrnlic, and mid mislicum þingum {184} gemenged, swa þæt heo for oft bið swiðe unwynsum on to eardigenne. Hwilon we beoð hale, hwilon untrume; nu bliðe, and eft on micelre unblisse; forðy is þis líf, swa swa we ær cwædon, þære sǽ wiðmeten.