Þa fif hlafas ðe se cnapa bær getacniað þa fif béc ðe Moyses se heretoga sette on ðære ealdan ǽ. Se cnapa ðe hi bær, and heora ne onbyrigde, wæs þæt Iudeisce folc, ðe ða fif béc ræddon, and ne cuðe þæron nan gastlic andgit, ærðan ðe Crist com, and þa béc geopenode, and hyra gastlice andgit onwreah his leorning-cnihtum, and hi siððan eallum cristenum folce. We ne magon nu ealle þa fif béc areccan, ac we secgað eow þæt God sylf hi dihte, and Moyses hí awrát, to steore and to lare ðam ealdan folce Israhel, and eac ús on gastlicum andgite. Þa béc wæron awritene be Criste, ac þæt gastlice andgit wæs þam folce digle, oð þæt Crist sylf com to mannum, and geopenede þæra boca digelnysse, æfter gastlicum andgite. Alii euangelistæ ferunt, quia panes et pisces Dominus discipulis distribuisset, discipuli autem ministrauerunt turbis. He tobrǽc ða fif hlafas and sealde his leorning-cnihtum, and het beran ðam folce; forðon þe hé tæhte him ða gastlican láre: and hí ferdon geond ealne middangeard, and bodedon, swa swa him Crist sylf tæhte. Mid þam ðe hé tobræc ða hlafas, þa wæron hí gemenigfylde, and weoxon him on handum; forðon ðe ða fíf béc wurdon gastlice asmeade, and wise {188} lareowas hí trahtnodon, and setton of ðam bocum manega oðre béc; and we mid þæra boca lare beoð dæghwonlice gastlice gereordode. Þa hláfas wæron berene. Bere is swiðe earfoðe to gearcigenne, and þeah-hwæðere fet ðone mann, þonne hé gearo bið. Swa wæs seo ealde ǽ swiðe earfoðe and digle to understandenne; ac ðeah-hwæðere, þonne we cumað to ðam smedman, þæt is to ðære getacnunge, þonne gereordað heo ure mod, and gestrángað mid þære diglan lare. Fif hlafas ðær wæron, and fif ðusend manna þær wæron gereordode; forðan ðe þæt Iudeisce folc wæs underðeodd Godes ǽ, ðe stód on fif bocum awriten. Þaða Crist axode Philippum, and he his afandode, swa swa we ær ræddon, þa getacnode he mid þære acsunge þæs folces nytennysse, þe wæs under ðære ǽ, and ne cuðe þæt gastlice andgit, ðe on ðære ǽ bediglod wæs. Ða twegen fixas getácnodon sealm-sang and ðæra witegena cwydas. An ðæra gecydde and bodode Cristes to-cyme mid sealm-sange, and oðer mid witegunge. Nu sind þa twa gesetnyssa, þæt is sealm-sang and witegung, swylce hí syflinge wæron to ðam fíf berenum hlafum, þæt is, to ðam fíf ǽlicum bocum. Þæt folc, þe ðær gereordode, sǽt úp on ðam gærse. Þæt gærs getacnode flæsclice gewilnunge, swa swa se witega cwæð, "Ælc flæsc is gærs, and þæs flæsces wuldor is swilce wyrta blostm." Nu sceal gehwá, seðe wile sittan æt Godes gereorde, and brucan þære gastlican lare, oftredan þæt gærs and ofsittan, þæt is, þæt he sceal ða flæsclican lustas gewyldan, and his lichaman to Godes þeowdome symle gebígan.