Arrius hatte an gedwolman, se flát wið ænne bisceop þe wæs genemned Alexander, wís and riht-gelyfed. Þa cwæð se gedwolman þæt Crist, Godes Sunu, ne mihte na beon his Fæder gelic, ne swa mihtig swa he; and cwæð, þæt se Fæder wære ær se Sunu, and nam bysne be mannum, hu ælc sunu bið gingra þonne se fæder on ðisum life. Þa cwæð se halga bisceop Alexander him togeanes, "God wæs æfre, and æfre wæs his Wisdom of him acenned, and se Wisdom is his Sunu, ealswa mihtig swa se Fæder." Þa begeat se gedwola þæs caseres fultum to his gedwylde, and cwæð gemót ongean ðone bisceop, and wolde gebigan eal þæt folc to his gedwyldum. Þa wacode se bisceop ane niht on Godes cyrcan, and clypode to his Drihtne, and ðus cwæð, "Ðu Ælmihtiga God, dém rihtne dóm betwux me and Arrium." Hi comon ða þæs on mergen to ðam gemote. Þa cwæð se gedwola to his geferum, þæt he wolde gán embe his neode forð. Þaða he to gange cóm and he gesǽt, þa gewand him út eall his innewearde æt his setle, and he sæt þær dead. Þa geswutulode God þæt he wæs swa geæmtogod on his innoðe swa swa he wæs ǽr on his geleafan. He wolde dón Crist læssan þonne he is, and his godcundnysse wurðmynt wanian; þa wearð him swa bysmorlic deað geseald swa swa he wel wyrðe wæs. Oðer gedwolman wæs se hatte Sabellius. He cwæð, þæt se Fæder wære, þaþa he wolde, Fæder; and eft, ðaða he wolde, he wære Sunu; and eft, ðaða he wolde, wære Hálig Gast; and wære forði án God. Þa forwearð eac þes gedwola mid his gedwylde. Nu eft þæt Iudeisce folc ðe Crist ofslogon, swa swa hé sylf wolde and geðafode, secgað þæt hí willað gelyfan on þone Fæder, and na on ðone Sunu ðe hyra magas ofslogon. Heora geleafa is naht, and hi forði losiað. For ure alysednysse Crist geðafode þæt hí hine ofslogon. Hit ne mihte {292} eal mancynn gedón, gif he sylf nolde; ac se Halga Fæder gesceop and geworhte mancyn þurh his Sunu, and he wolde eft þurh ðone ylcan us alysan fram helle-wíte, ðaða we forwyrhte wæron. Buton ælcere ðrowunge he mihte us habban, ac him ðuhte þæt unrihtlic. Ac se deofol forwyrhte hine sylfne, ðaða hé tihte þæt Iudeisce folc to ðæs Hælendes slege, and we wurdon alysede, þurh his unscyldigan deað, fram ðam ecan deaðe. We habbað þone geleafan ðe Crist sylf tæhte his apostolum, and hi eallum mancynne; and ðone geleafan God hæfð mid manegum wundrum getrymmed and gefæstnod. Ærest Crist ðurh hine sylfne dumbe and deafe, healte and blinde, wode and hreoflige gehælde, and ða deadan to lífe arærde: syððan, þurh his apostolas and oðre halige men, þas ylcan wundra geworhte. Nu eac on urum timan, gehwær þær halige men hí restað, æt heora deadum banum God wyrcð fela wundra, to ði þæt he wile folces geleafan mid þam wundrum getrymman. Ne wyrcð God na þas wundra æt nanes Iudeisces mannes byrgene, ne æt nanes oðres gedwolan, ac æt riht-gelyfedra manna byrgenum, ða ðe gelyfdon on ða Halgan Ðrynnysse, and on soð Annysse anre Godcundnysse.