Eft on fyrste, æfter Cristes upstige to heofonum, rixode sum wælhreow casere on Romana ríce, æfter Nerone, se wæs Domicianus gehaten, cristenra manna ehtere: se het afyllan ane cyfe mid weallendum ele, and þone mæran godspellere þæron het bescufan; ac he, ðurh Godes gescyldnysse, ungewemmed of ðam hatum bæðe eode. Eft ðaða se wælreowa ne mihte ðæs eadigan apostoles bodunge alecgan, þa asende he hine on wræcsið to anum igeoðe þe is Paðmas gecíged, þæt he ðær þurh hungres scearpnysse acwæle. Ac se Ælmihtiga Hælend ne forlét to gymeleaste his gelufedan apostol, ac {60} geswutelode him on ðam wræcsiðe þa toweardan onwrigenysse, be ðære hé awrat ða bóc ðe is gehaten APOCALIPSIS: and se wælhreowa Domicianus on ðam ylcan geare wearð acweald æt his witena handum; and hí ealle anmodlice ræddon þæt ealle his gesetnyssa aydlode wæron. Þa wearð Nerua, swiðe arfæst man, to casere gecoren. Be his geðafunge gecyrde se apostol ongean mid micclum wurðmynte, seðe mid hospe to wræcsiðe asend wæs. Him urnon ongean weras and wif fægnigende, and cweðende, "Gebletsod is se ðe com on Godes naman." Mid þam ðe se apostol Iohannes stop into ðære byrig Ephesum, þa bær man him togeanes anre wydewan líc to byrigenne; hire nama wæs Drusiana. Heo wæs swiðe gelyfed and ælmesgeorn, and þa ðearfan, ðe heo mid cystigum mode eallunga afedde, dreorige mid wópe ðam líce folgodon. Ða het se apostol ða bære settan, and cwæð, "Min Drihten, Hælend Crist! Arære ðe, Drusiana; aris, and gecyrr ham, and gearca ús gereordunge on þinum huse." Drusiana þa arás swilce of slæpe awreht, and, carfull be ðæs apostoles hæse, ham gewende.