On ðam oðrum dæge eode se apostol be ðære stræt, þa ofseah he hwær sum uðwita lædde twegen gebroðru, þe hæfdon behwyrfed eall heora yldrena gestreon on deorwurðum gymstanum, and woldon ða tocwysan on ealles þæs folces gesihðe, to wæfersyne, swylce to forsewennysse woruldlicra æhta. Hit wæs gewunelic on ðam timan þæt ða ðe woldon woruld-wisdom gecneordlice leornian, þæt hí behwyrfdon heora are on gymstanum, and ða tobræcon; oððe on sumum gyldenum wecge, and ðone on sǽ awurpan; þilæs ðe seo smeaung þæra æhta hí æt þære lare hremde. Þa clypode se apostol ðone uðwitan Graton him to, and cwæð, "Dyslic bið þæt hwa woruldlice speda forhogige for manna hérunge, and beo on Godes dome geniðerod. Ydel bið se læcedom þe ne mæg ðone untruman gehælan; swa bið eac ydel seo lár ðe ne gehælð ðære sawle leahtras and unðeawas. {62} Soðlice min lareow Crist sumne cniht ðe gewilnode þæs ecan lifes þysum wordum lærde, Þæt he sceolde ealle his welan beceapian, and þæt wurð ðearfum dælan, gif hé wolde fulfremed beon, and he syððan hæfde his goldhord on heofenum, and ðær to-eacan þæt ece líf." Graton ða se uðwita him andwyrde, "Þas gymstanas synd tocwysede for ydelum gylpe, ac gif ðin láreow is soð God, gefeg ðas bricas to ansundnysse, þæt heora wurð mæge þearfum fremian." Iohannes þa gegaderode ðæra gymstana bricas, and beseah to heofonum, þus cweðende, "Drihten Hælend, nis ðe nan ðing earfoðe; þu ge-edstaðelodest ðisne tobrocenan middangeard on þinum geleaffullum, þurh tácen þære halgan rode; ge-edstaðela nu þas deorwurðan gymstanas, ðurh ðinra engla handa, þæt ðas nytenan menn þine mihta oncnáwon, and on þe gelyfon." Hwæt, ða færlice wurdon ða gymstanas swa ansunde, þæt furðon nan tácen þære ærran tocwysednysse næs gesewen. Þa se uðwita Graton samod mid þam cnihtum feoll to Iohannes fotum, gelyfende on God. Se apostol hine fullode mid eallum his hirede, and hé ongann Godes geleafan openlice bodian. Þa twegen gebroðra, Atticus and Eugenius, sealdon heora gymstanas, and ealle heora æhta dældon wǽdlum, and filigdon þam apostole, and micel menigu geleaffulra him eac to geðeodde.