Se Godspellere Lucas beleac þis dægþerlice godspel mid feawum wordum, ac hit is mid menigfealdre mihte þære heofenlican gerynu afylled. He cwæð, "Postquam consummati sunt dies octo ut circumcideretur puer, uocatum est nomen ejus Iesus, quod uocatum est ab angelo, priusquam in utero conciperetur." Þæt is on ure geðeode, "Æfter þan ðe wǽron gefyllede ehta dagas Drihtnes acennednysse þæt he ymbsniden wære, þa wæs his nama geciged Iesus, þæt is Hælend, ðam naman he wæs geháten fram ðam engle, ærðam þe hé on innoðe geeacnod wære." Abraham se heahfæder wæs ærest manna ymbsniden, be Godes hæse. Abraham wæs Godes gespreca, and God to him genam geþoftrædene æfter Noes flóde swiðost, and him to cwæð, "Ic eom Ælmihtig Drihten, gang beforan me, and beo fulfremed. And ic sette min wed betwux me and ðe; and ic ðe þearle gemenigfylde, and þu bist manegra þeoda fæder. Cyningas aspringað of ðe, and ic sette min wed betwux me and ðe, and þinum ofspringe æfter ðe, þæt ic beo ðin God and ðines ofspringes." Abraham hine astrehte eallum limum to eorðan, and God him to cwæð, "Heald þu min wed, and þin ofspring æfter ðe on heora mægðum. Ðis is min wed, þæt ge healdan sceolon betwux me and eow; þæt ælc hyse-cild on eowrum cynrene beo ymbsniden: þæt tácn sy betwux me and eow. Ælc hyse-cild, þonne hit eahta nihta {92} eald bið, sy ymbsniden, ægðer ge æþelboren ge þeowetling; and seðe þis forgæið his sawul losað, forðan þe hé min wed aýdlode. Ne beo ðu geciged heonon-forð Abram, ac Abraham, forðan þe ic gesette ðe manegra þeoda fæder. Ne ðin wif ne beo gehaten Saraí, ac beo gehaten Sarra; and ic hí gebletsige, and of hire ic ðe sylle sunu, þone ðu gecigest Isaac; and ic sette min wed to him and to his ofspringe on ecere fæstnunge. And æfter ðære spræce se Ælmihtiga up gewende." On þam ylcan dæge wæs Abraham ymbsniden, and eal his hyred, and syððan his sunu Isaac, on ðam eahtoðan dæge his acennednysse. Abrahames nama wæs æt fruman mid fif stafum gecweden, Abram, þæt is, 'Healic fæder'; ac God geyhte his naman mid twam stafum, and gehet hine Abraham, þæt is, 'Manegra ðeoda fæder'; forðan þe God cwæð, þæt he hine gesette manegum ðeodum to fæder. Saraí wæs his wíf gehaten, þæt is gereht, 'Min ealdor,' ac God hi het syððan Sarra, þæt is, 'Ealdor,' þæt heo nære synderlice hire hiredes ealdor geciged, ac forðrihte 'Ealdor'; þæt is to understandenne ealra gelyfedra wifa moder. Hund-teontig geara wæs Abraham, and his gebedda hund-nigontig, ærðan ðe him cild gemæne wære. Þaða him cild com, þa com hit mid Godes foresceawunge and bletsunge to þan swiðe, þæt God behet eallum mancynne bletsunge þurh his cynn. Ða heold Abrahames cynn symle syððan Godes wed; and se heretoga Moyses, and eal Israhela mægð ealle hi ymbsnidon heora cild on þam eahtoðan dæge, and him naman gesceopon, oð þæt Crist on menniscnysse acenned wearð, seðe fulluht astealde, and ðære ealdan ǽ getacnunge to gastlicere soðfæstnysse awende.