Nauim expectamus subsidio venturam. Interim Pistores ac Fabri magno scilicet nomine atque antiquo viuimus, & [35] incidimus quibus vterque in grauem ægritudinem, sed Dominus supposuit manū suam. Nam neque id diu fuit, & semper altero decumbente, alter stetit. Experimur sanè, quantum sit onus vitæ necessitas, dum lignatum, dum aquatum imus, dum coquimus ipsi nobis, dum indumenta aut lauamus, aut reficimus, dum sarcimus tugurioli labes, dum in reliqua corporis cura necessariò detinemur. Inter hæc dies nobis, miserè, noctésque depereunt; illa nos spes consolatur ac sustentat, fore, vt qui subleuat abiectos DEVS, vilitatem ipse nostram pro sua quandoque misericordia non despiciat. Quamquā certè dum in subsidiorum inopiam, dum in asperitatem regionis & gentis mores, dum in difficultates rerum, & coloniæ constituendæ, dum in mille pericula obicésqʒ vel maris vel hominum intendimus, somnium & idea Platonica videtur quod conamur. Demonstrarem hoc sigillatim, nisi hoc esset cum Hebræis exploratoribus magis pro humanis viribus, quàm pro diuino auxilio, nec minus ex [36] animi languore, quàm ex rei veritate dicere: Terra hæc deuorat habitatores suos; nos locustæ sumus, cùm hic monstra sint de genere Giganteo. Sed enim tamen, quanticunque sint hi Gigantes, præualebit ille Dauid in funda & lapide, qui conculcat terram in fremitu suo, & in furore obstupefacit gentes; ille IESVS hominum Seruator, qui benefacit terram & perficit eam, quantumcunque infirmata sit; ille verò, ille, vti speramus, benignitatis ac potentiæ suæ ducet esse, vt quod vaticinatus est Isaias, _Exultet solitudo & floreat sicut lilium_: quemadmodum sapientiæ paritérqʒ potentiæ suæ reputauit id, quod cernimus, vt cultissima imperia, atque omnibus elata viribus, & gloriâ; suæ cruci atque humilitati subiugarentur. Amen ita sit. Atque hoc nostrum votum adiuuent comprecatione sua cœlites omnes, atque in primis cœlitum Regina & præses; adiuuet Ecclesia vniuersa, speciatímque Ecclesiæ pars illa, cui Paternitas vestra nutu diuino iam diu præest, Societas, votum meum; adiuuet oro atque obsecro [37] Paternitas vestra omni ope, suámque nobis ad id benedictionem pijssimam, si placet, largiatur. E portu Regali in noua Francia vltimo die Ianuarij Anni CIↃ.IↃC.XI. _Vestræ Paternitatis filius ac seruus indignus_ PETRVS BIARDVS. NOTES: [IV.] _Sic._ pro Kinibequi.