Le sieur de Poutrincourt n'eut à-peine pris haleine apres tant de travaux, qu'il envoya chercher Membertou premier & plus ancien Capitaine de cette contrée, pour lui rafrechir la memoire de quelques enseignemens de la Religion Chrétienne que nous lui avions autrefois [10] donné, & l'instruire plus amplement és choses qui concernent le salut de l'ame, afin que cetui-ci reduit, plusieurs autres à son exemple fissent le méme. Comme de fait il arriva. Car apres avoir esté catechizé, & les siens avec lui, par quelque temps, il fut baptizé, & vingt autres de sa troupe, le iour sainct Iehan Baptiste 1610. [_Liv. 5. ch. 5. pa. 638._] les noms desquels i'ay enrollé en mon Histoire de la Nouvelle France selon qu'ils sont écrits au registre des baptémes de l'Eglise metropolitaine de dela, qui est au Port Royal. [_Mission._] Le Pasteur qui fit ce chef d'œuvre fut Messire Iesse Fleuche natif de Lantage, diocese de Langres, homme de bonnes lettres, lequel avoit pris sa mission de Monsieur le Nonce du Sainct Pere Euesque de Rome, qui estoit pour lors, & est encore à Paris. Non qu'un Euéque François ne l'eust peu faire: mais ayant fait ce choix, ie croy que ladite mission est aussi bonne de lui (qui est Evéque) que d'vn autre, encore qu'il soit étranger. Toutefois i'en laisse la cõsideration à ceuq qui y ont plus d'interest que moy, estant chose qui se peut disputer d'une part & d'autre, parce qu'il n'est pas ici en son diocese. Ledit Seigneur Nonce, dit Robert Vbaldin, lui bailla permission d'ouir par dela les confessions de toutes personnes, & les absoudre de tous pechés & crimes non reservés expressement au siege Apostolique; & leur enioindre des penitences selon la qualité du peché. En outre lui donna pouvoir de consacrer & benir des chasubles & autres vétemens sacerdotaux, & des paremens d'autels, excepté [11] des Corporaliers, Calices, & Paténes. C'est ainsi que ie l'ay leu sur les lettres de ce octroyées audit Fleuche premier Patriarche de ces terres là. Ie di patriarche, par ce que communement on l'appelloit ainsi: & ce mot l'a deu semondre à mener vne vie pleine d'integrité & d'innocence, comme ie croy qu'il a fait. Or ces baptizailles ne furent sans solennités. [_confession de Foy de Membertou._] Car Membertou (& consequemment les autres) avant qu'estre introduits en l'Eglise de Dieu, fit vne reconoissance de toute sa vie passée, confessa ses pechés, & renonça au diable, auquel il avoit servi. Là dessus chacun chanta le _Te Deum_ de bon courage, & furent les canons tirés avec grand plaisir, à-cause des Echoz qui durent audit Port Royal, prés d'un quart d'heure. C'est vne grande grace que Dieu a fait à cet homme d'avoir receu le don de la Foy, & de la lumiere Evangelique, en l'âge où il est parvenu, qui est à mon avis de cent dix ans ou plus. Il fut nommé HENRI du nom de nostre feu Roy HENRI le Grand. [_Pa. 638._] D'autres furent nommez des noms du sainct Pere le Pape de Rome, de la Royne, & Messeigneurs & Dames ses enfans,