Or Madame la Marquise de Guercheuille, comme entre ses autres rares & singulieres vertus, elle est ardamment zelée à la gloire de Dieu, & conuersion des ames: voyant vne si belle occasion, [128] demanda au Pere Coton si à celle foys aucuns de leur compagnie ne s'en iroyent point à la nouuelle France. Le Pere Coton respondit, qu'il s'estonnoit fort du sieur de Potrincourt, qui luy auoit promis, que renuoyant son fils il appelleroit ceux de son ordre, qui auoyent esté destinés par le Roy; & ce nonobstant il ne faisoit aucune mention d'eux, ny par ses lettres, ny par ses commissions. Madame la Marquise voulut sçauoir comm'alloit tout cet affaire, & s'en enquit du sieur Robin: qui respondit, que toute la charge de l'embarquement luy auoit esté baillée, mais qu'il n'auoit point de commission particuliere pour les Iesuites; neantmoins qu'il sçauoit assez, que le sieur de Potrincourt se sentiroit fort honoré de les auoir aupres de soy, que pour leur entretenement luy [129] mesme s'en chargeroit, comme il faisoit aussi du reste de toute la despense: vous n'en serés point chargé respõdit madame la Marquise, parce que le Roy les defraye. Et auec tel propos enuoya ledit de Coloignes au P. Christofle Baltasar Prouincial. Lequel sur ces promesses manda au P. Pierre Biard, (qui lors estoit à Poictiers,) de venir à Paris, & luy fut donné pour compagnon le P. Enemond Massé, Lyonnois. Eux deux ainsi destinés à ce voyage de Canada, s'abboucher[~e]t auec les sieurs Robin & Biencourt, & partie faicte le rendez-vous fut assigné à Dieppe au 24. d'Octobre de la mesme année 1610. Car en ce temps là disoyent-ils, tout sera prest, si le vent, & la marée le sont.