Cependant que tout cecy se traffiquoit, le P. Biard ouyt, que le ieune du Pont estoit à terre auec les Sauuages, que l'année prochainement passée il auoit esté faict prisonnier par le sieur de Potrincourt, d'où s'estant euadé subtilement, il auoit esté contrainct courir les bois en grande misere, & lors mesme il n'osoit aller à son nauire, de peur qu'il n'y fust saisi. Le P. Biard ouyant tous ces accidents, [147] supplia le sieur de Potrincourt d'auoir esgard aux grands merites du sieur du Pont le pere, & aux belles esperances qu'il y auoit du fils; adioustant que vrayement c'estoit bien estre malheureux, si les François courants au bout du monde pour conuertir les Sauuages, y venoyent perdre leurs propres concitoyens. Le sieur de Potrincourt se flechist à ces remonstrances, & permit audit P. Biard d'aller chercher le ieune homme auec promesse, que s'il pouuoit l'induire à venir librement, pour faire la reuerence audit sieur de Potrincourt, aucun mal ne luy seroit faict, & tout le passé seroit mis sous les pieds, & enseuely. Le Pere y alla, & fut heureux en sõ effort, car il amena ledit du Pont au sieur de Potrincourt, & paix, & reconciliation faicte, on tira le canon. Du Pont [148] en action de graces, & pour l'edification des François, & des Sauuages voulut se confesser le iour suiuant, & faire ses Pasques, car il ne les auoit point faictes de cest'année là. Aussi les fit-il auec fort bon exemple de tous, au bord de la mer, où se chantoit le seruice. Ses deuotions acheuées il supplia le sieur de Potrincourt de permettre que le P. Biard vinst disner à son nauire, ce qui luy fut accordé. Mais le pauure inuitãt ne sçauoit pas quelle desserte l'att[~e]doit. Car ie ne sçay cõment son nauire luy fut saisi, & emmené. Lequel pour le faire court, luy fut rendu à la sollicitation instante dudit P. Biard, qui en auoit le coeur tout transi. En quoy le sieur de Potrincourt se mõstra fort equitable. Et voulut obliger ledit Père, qui luy en sçaura gré à iamais.