Dieu mercy, tout passa heureusement: Platrier nous traicta le mieux qu'il peut: Et à son ayde le sieur de Biencourt recouura vne barque, laquelle estoit à Port aux Coquilles, auec laquelle il s'en retourna à Port Royal, où [158] on trouua nouuelle besongne: car Henry Membertou, le Sagamo de Sauuages, qui premier d'iceux auoit receu le S. Baptesme, estoit venu de la Baye saincte Marie, pour se faire penser d'vne maladie, qui l'auoit surprins. Le pere Enemond Massé l'auoit logé dans sa petite Cabane, au lict mesme du P. Biard, & là le seruoit comme vn sien pere & domestique. Le P. Biard trouuant ce malade dans son lict, fut bien ayse de l'occasion de charité, que Dieu luy enuoyoit: Et tous deux se mirent à le seruit de iour, & de nuict, sans qu'autre quelconque les y soulageast, hors l'Apoticaire Hebert, qui apportoit des medecines, & viandes qu'il luy falloit dõner. Vne de leurs plus grandes peines estoit de tãt couper & aporter de bois qu'il en falloit pour le iour, & la nuict: Car la nuict commençoit à estre [159] bien frilleuse, & tousiours il falloit bon feu, à cause de la mauuaise senteur, d'autant que c'estoit la dysenterie. Au bout de cinq, ou six iours de tel seruice, la femme, & la fille dudict Membertou vindrent à luy, à cause dequoy le P. Biard pria le sieur de Biencourt de faire changer le malade en quelque autre des cabanes de l'habitation, puis qu'il y en auoit deux ou trois vuides; parce qu'il n'estoit ny beau, ny bien seant que des femmes fussent iour, & nuict en leur cabane: & moins encores qu'elles n'y fussent, estans la femme, & la fille du malade. D'autre part, la cabane estoit si petite, que quand on y estoit quatre assemblez, lon ne s'y pouuoit tourner.