Or pendant qu'on faisoit ceste trocque, le P. Biard s'en estoit allé en vne Isle proche, auec vn garçõ pour celebrer la saincte Messe. Les Sauuages à l'occasion de la traicte qui se deuoit faire, se ietterent fort auidement, & à la foule dans nostre barque; de curiosité (comme i'estime) pource qu'ils ne voyent pas souu[~e]t tels spectacles. Nos gens auoient peur, que ce ne fust malice, & que soubs couleur de trocque, ils ne se voulussent [178] saisir de la barque: aussi s'estoyent ils armez, & barricadez, à fin de n'estre surprins voyant donc, que nonobstant leurs menaces, & crieries, ils ne cessoyent d'entrer à la file, & que ja ils estoyent bien trente sur le tillac, ils cuiderent que tout à faict c'estoit à bon jeu, qu'on les vouloit surprendre: & ja couchoi[~e]t en iouë pour tirer. Mõsieur de Biencourt a souuent dit, & souuent repeté despuis, qu'il eut plusieurs fois sur la langue de crier, tuë, tuë: Mais que ceste consideration le retint, que le Pere Biard estoit à terre, qui ne falliroit d'estre massacré si lon meffaisoit à aucun Sauuage. Ceste consideration obligea le P. Biard, & nous sauua trestous: car si lon eust comm[~e]cé la charge, il n'est pas croyable, qu'on eust iamais peu eschapper la chaude chole & furieuse poursuite des Sauuages dedãs vne [179] riuiere, qui a tant de tours, & retours, & souuent bien estroicts, & perilleux: outre que de cent ans après ceste coste n'eust peu estre reconciliable, ny hospitaliere aux François, tant les Sauuages euss[~e]t eu ceste offense dessus le coeur. Dieu doncques nous sauua par ceste consideration. Et de là tous Capitaines retiendront de n'estre point trop subits aux executions de perilleuse suite. Or les Sagamos s'apperceuans d'eux mesmes de la iuste apprehension, où leurs gens poussoient nos François, se prindrent à les retirer hastiuement, & mirent ordre à la confusion.