L'Anglois apres ceste premiere, & furieuse escopeterie mit son nauire de costé, & tenoit vn Anchre preparé pour accrocher nostre bite. Le Capitaine Flory fila du chable fort à propos, ce qui arresta l'ennemy, & luy fit tourner à costé: car il eust peur qu'en poursuiuant on ne le voulust attirer sur des basses; despuis voyant nostre nauire à requoy, & s'estant rasseuré, il recommença les approches auec escopeterie comme deuant. Ce fut en ceste seconde charge, que Gilbert du Thet reçeut vn coup de mosquet dans le corps & tomba estendu à l'enuers sur le tillac. Le Capitaine Flory fut aussi blessé au pied, & autres trois autre part, ce qui fit faire signe, & [236] crier qu'on se rendoit. Aussi certes la partie n'estoit pas egale. A ce cry, l'Anglois se ietta dans son bateau pour venir à nostre nauire. Nos gents aussi par mauuais conseil, se ietterent dans le leur, pour faire à terre: car ils craignoyent l'arriuée du victorieux. Le vainqueur fut plustost dans nostre nauire, qu'eux ne furent loin, & partant il se print à leur crier, qu'ils retournassent, & pour les y contraindre tiroit sur eux. Dequoy espouuãtez deux de nos g[~e]s se ietterent dans l'eau pour à mõ aduis gaigner terre à la nage, mais ils furent noyez, soit que ja ils eussent esté blessez, soit (ce qui est plus vray semblable) qu'ils fussent attaints, & percez dans l'eau. C'estoyent deux ieunes compagnons de bonne expectation, l'vn de Dieppe, appellé le Moyne, l'autre dit Nepueu, de la ville de [237] Beauuais: leurs corps ne comparurent que neuf iours apres. On eust moyen de les prendre & religieusement les enterrer: telle fut la prinse de nostre nauire.