Sur la my Mars le poisson commence à frayer, & monter de la mer en haut contre certains ruisseaux, souuent en si grand' abondance, que tout en formille. A peine le croiroit, qui ne l'auroit veu. On ne sçauroit mettre la main dans l'eau, qu'on ne rencõtre proye. Entre ces poissons l'eplan est le premier: cest eplan est deux & trois fois plus grand que [45] n'est le nostre de riuiere: apres l'eplan suit le harenc à la fin d'Auril, & au mesme temps les outardes arriuent du Midy, qui sont grosses cannes au double des nostres, & font volontiers leurs nids aux Isles. Deux oeufs d'outarde en valent richement cinq de poule. A mesme termoyement vient l'estourgeon, & le saumon, & la grande queste des oeufs par les Isletes, car les oiseaux pescherets, qui sont là en tre[=s] grande foison, pondent lors, & souuent couur[~e]t de leurs nids ces Islettes. Dés le mois de May iusques à la my-Septembre, ils sont hors de tout esmoy pour leur viure: car les mouluës sont à la coste, toute sorte de poisson & coquillage; & les nauires François auec lesquels ils trocquent; & sçauez vous s'ils entendent bien à se faire courtiser. Ils tranchent des freres auecques [46] le Roy, & ne leur faut rien rabattre de toute la piece. Il faut leur faire des presents, & les bien harãguer auant qu'ils accordent la traicte; & icelle faicte, faut encores les Tabagier, c'est à dire, les banqueter. Alors ils danseront, harangueront & chanteront _Adesquidex, Adesquidex_, Sçauoir est, qu'ils sont les bons amys, alliés, associés, confederés, & comperes du Roy, & des François.