Ie me suis enquis souuent, combien grand pourroit estre le nombre de ce peuple: I'ay trouué par [73] la Relation des Sauuages mesmes, que dans l'enclos de la grande riuiere, dés les Terres Neufues iusques à Chouacoët, on ne sçauroit trouuer plus de neuf ou dix mill'ames. Regardez la carte, & ie vous en donneray le denombrement. Tous les Souriquoys 3000. ou 3500. Les Eteminquois iusques à Pentegoët 2500. Dés Pentegoët iusques à Kinibequi, & de Kinibequi iusques à Chouacoët 3000. Les Montaguets 1000. Voila enuiron dix mill'ames, & ie crois que c'est pour le plus. Les autres peuples ne nous sõt pas cogneus. Aduisez combien veritablement, & emphatiquement a parlé le S. Esprit par la bouche d'Isaye de ces pauures Sauuages dispersez, soubs la metaphore propre & conuenable d'vn grãd vergier, ou parterre sauuagin, & forestier. _Il ne fait que florir encores, sur le temps de la recolte_, [74] dit-il, _Il germe, quand il deuroit estre venu à maturité: Il le faut lors émonder, & tailler; C'est pourquoy ses fruicts sont delaissez aux oyseaux des montagnes & bestes de la terre: Les oyseaux jucheront sur luy tout l'Esté; & toutes les bestes de terre hyuerneront sur luy._ Car certainement, ce pauure peuple, comme vn grand plan de sauuageons mal nez, & de mauuaise venuë, quand par le laps & experience des siecles, il deuroit estre venu à quelque perfection des arts, sciences, & raison: Qu'il en deuroit auoir produict fruict abondant en philosophie, police, moeurs, & commoditez de la vie; qu'il deuroit estre ja disposé à la maturité du S. Euangile, pour estre recueilly en la maisõ de Dieu: voila qu'on ne le voit sinon chetif & rare, donné la pasture des corbeaux, hiboux & cocus infernaux: & la curee maudite des renards, [75] ours, sangliers, & dragons spirituels. O Dieu de misericorde! n'aurez vous point pitié de ce desastre? Ne ietterez-vous point vos yeux de douceur sur ce pauure desert? Benin, & pieux laboureur, faictes que la prophetie, qui suit se verifie en nous en nostre âge. _En ce t[~e]ps là present sera apporté au Seigneur des Armées par le peuple rompu, & deschiré, par le peuple terrible, apres qui n'en y a point d'autre; La nation attendãte, attendante, & mesprisee, de qui les fleuues ont gasté la terre; au lieu où est inuoqué le nom du Seigneur des Armées à la montagne de Sion._ Ainsi soit-il.