Le 10. on nous donna aduis sur le soir qu'vn petit Sauuage estoit malade à la mort, il y auoit vne bonne demie lieuë de chemin à faire depuis nostre maison iusques à sa cabane. La nuict approchoit, la mort du dernier François a ietté quelque défiance dans l'esprit des autres, si bien qu'on se tient vn peu sur ses gardes: nonobstant cela, ie ne pouuois permettre que ce pauure petit fut abandonné: i'auois desir de l'aller baptiser moy-mesme, mais ayant esté indisposé, & ressenty quelques accés de fiéure depuis quelque tẽps: nos Peres trouuerent plus à propos que le Pere Brebeuf y allast. Il part [252 i.e., 152] donc auec le Pere de Nouë dans vn canot, ils rencontrerent vn François aupres des Cabanes, qui leur dit que ces Sauuages ne vouloient point monstrer leur enfant aux François, cela ne les arreste point, ils entrent dans la Cabane, & le Pere Brebeuf qui iargonne aussi bien que moy en Sauuage, leur fit entendre le mieux qu'il pût la cause de sa venuë: le Pere de Nouë courut incontinent vers le Truchement, pour le supplier de venir faire vn tour vers ce malade. Cõme il est fort honneste homme & bien vertueux, il quitte son soupper, & s'en vient trouuer les Peres, qui le supplient de declarer aux Sauuage pourquoy ils venoiẽt si tard: scauoir est qu'ils aimoient ce petit enfant, & que s'il mouroit sans baptesme, qu'il n'iroit point au Ciel: au contraire si on le baptisoit, qu'il seroit tousiours bien-heureux. Ils demandent en [253 i.e., 153] outre si ses parens ne seroient pas biẽ contens qu'on le baptisast: la mere respond que pour elle qu'elle en estoit tres-contente, que son mary estoit yure, & qu'il dormoit dans vne autre Cabane. Le Pere passe outre, & demande si au cas qu'il mourut, ils ne voudroiẽt pas bien l'apporter en nostre maison, pour l'enterrer en nostre Cimetiere: & s'il retournoit en santé, si elle ne voudroit pas bien nous le dõner pour l'instruire: elle respond que son fils estoit mort, & que s'il rechappoit, qu'aussi-tost qu'il pourroit marcher (car il n'a enuiron que six mois) qu'elle nous l'ameneroit. Vn Sauuage entẽdāt cela, courut voir le pere de l'enfant; & l'éueilla; luy ayant rapporté tout ce qu'auoient dit les Peres, il respōdit; encore que ie sois yure, i'entend biẽ tout ce que tu dis: va t'en, & dis à ces Peres qu'ils baptisent mõ fils? ie scay [254 i.e., 154] bien qu'ils ne luy feront point de mal; s'il meurt, c'est qu'il est mortel; s'il réchappe, ie leur donneray pour l'instruire. Le Messager rapporta la nouuelle, & le Pere Brebeuf enuoye querir de l'eau à la riuiere, cependant le Pere de Nouë & le Truchement se mettent à genoux, recitent l'Hymne _Veni Creator_; & le Pere Brebeuf baptise ce pauure petit, luy donnant le nom de François, en l'honeur de S. François Xauier: disant aux parens que d'oresnauant il le falloit nommer François, & que s'il mourroit, qu'il iroit tout droit au Ciel, où il seroit à iamais bien-heureux. Ces pauures gens témoignerent vn tres-grand contentement, reïterans