Ils ne sont point vindicatifs entr'eux, si bien enuers leurs ennemis. Ie coucheray icy vn exẽple capable de confondre plusieurs Chrestiens. Dans les pressures de nostre famine, vn ieune Sauuage d'vn autre quartier nous vint voir, il estoit aussi affamé que nous; le iour qu'il vint fut vn iour de ieusne pour luy & pour nous, car il ny auoit dequoy manger: le lendemain nos chasseurs ayãs pris quelques Castors, on fit festin auquel il fut très biẽ traitté, on luy dit en outre qu'õ auoit veu les pistes d'vn Orignac, & qu'on l'iroit chasser le lendemain; on l'inuita à demeurer, & qu'il en auroit sa part, luy respõdit qu'il ne pouuoit estre dauantage; s'estant doncques enquis du lieu où étoit la beste, il s'ẽ retourna: Nos Chasseurs ayans trouué & tué le lendemain [106] cest Elan, l'enseuelirent dãs la neige, selon leur coustume, pour l'enuoyer querir au iour suiuãt. Or pendãt la nuict mon ieune Sauuage cherche si biẽ, qu'il trouue la beste morte, & en enleue vne bõne partie sans dire mot, le larcin connu par nos gens, ils n'entrerent point en des furies, ne donnerent aucune malediction au voleur; toute leur cholere fut de se gausser de luy, & cependãt c'estoit presque nous oster la vie, que de nous dérober nos viures, car nous n'en pouuions recouurer. A quelque temps de là, ce voleur nous vint voir, ie luy voulus representer la laideur de son crime, mon hoste m'imposa silence, & ce pauure hõme rejettant son larcin sur les chiens, nõ seulement fut excusé, mais encore receu pour demeurer auec nous dans vne mesme Cabane. Il s'en alla donc querir sa femme, qu'il apporta sur son dos, car elle a les iambes sans mouuement; & vne ieune parente qui demeure auec luy apporta son petit fils, & tous quatre prirent place en nostre petit todis, sans que iamais on leur aye reproché ce larcin, ains au contraire on leur a tesmoigné tres-bõ visage, & les a-on traittez comme [107] ceux de la maison. Dites à vn Sauuage, qu'vn autre Sauuage a dit pis que pendre de luy, il baissera la teste, & ne dira mot: s'ils se rencõtrent par apres tous, ils ne feront nõ plus de semblant de cela, comme si riẽ n'auoit esté dit, ils se traitteront comme freres, ils n'ont point de fiel enuers leur nation.