Les Lettres de vostre Reuerence, les tesmoignages de son affection pour la cõuersion de ces peuples, les effets de son amour en nostre endroit, la venuë de nos Peres qu'il luy a pleu nous enuoyer pour renfort cette année, les desirs qu'ont vn si grand nombre des nostres de venir en ces contrées sacrifier leurs vies & leurs trauaux pour la gloire de Nostre Seigneur: Tout cela ioinct auec le bon succez qu'eurent [2] les vaisseaux l'an passé à leur retour, & l'heureuse arriuée de ceux qui sont venus cette année, auec le zele que tesmoignent Messieurs les associez de la Compagnie de la nouuelle France pour la conuersion de ces peuples barbares. Tous ces biens ioincts ensemble venãs fondre tout à coup dans nos grands bois par l'arriuée de Monsieur du Plessis General de la flotte qui nous met dãs la ioüissance des vns, & nous apporte les bonnes nouuelles des autres, nous comblent d'vne consolation si grande, qu'il me seroit bien difficile de la pouuoir bien expliquer: Dieu en soit beny à iamais, si sa bonté continuë de se respandre sur ces Messieurs, comme nous l'en prions de toute l'estenduë de nostre cœur, tant d'ames plongées dans vne nuict d'erreur qui dure depuis vn si long-temps, verront en fin le iour des veritez Chrestiennes: Et nostre bon Roy, Monseigneur le Cardinal, Messieurs les Associez, Monsieur le Marquis de Gamache grand appuy de nostre Mission & quantité d'autres, par la faueur desquels le Sang du Fils de Dieu leur sera vn iour appliqué, auront la gloire & le merite d'auoir contribué à vne si saincte œuure. [1] Relation of what occurred in New France on the Great River St. Lawrence, in the year one thousand six hundred thirty-four. MY REVEREND FATHER,