Le second Sauuage baptizé a esté nostre Manitouchatche autrement la Nasse, i'en ay parlé dans mes Relations precedentes, il s'estoit comme habitué aupres de nous auant la prise du païs par les Anglois, commençant à defricher & à cultiuer la terre, le mauuais traictement qu'il receut de ces nouueaux hostes l'ayãt esloigné de Kebec, il tesmoignoit par fois à Madame Hebert qui resta icy auec toute sa famille qu'il souhaittoit grandement nostre retour. Et de fait si tost qu'il sceut nostre venuë il nous vint voir, & se cabana [15] tout aupres de nostre maison, disant qu'il se vouloit faire Chrestien, nous asseurant qu'il ne nous quitteroit point si nous ne le chassions, aussi ne s'est-il pas beaucoup absenté depuis que nous sommes icy, cette communication luy a fait conceuoir quelque chose de nos mysteres. Le seiour qu'a fait en nostre maison Pierre Antoine le Sauuage son parent luy a seruy, d'autant que nous luy auõs declaré par sa bouche les principaux articles de nostre creance. O que les iugemens de Dieu sont pleins d'abismes! Ce miserable ieune homme qui a esté si bien instruict en France s'estant perdu parmy les Anglois, comme i'escriuis l'an passé, est deuenu apostat, renegat, excommunié, athée, valet d'vn Sorcier qui est son frere: Ce sont les qualitez que ie luy donneray cy apres parlant de luy: & ce pauure vieillard qui a tiré de sa bouche infectée les veritez du Ciel, a trouué le Ciel, laissant l'Enfer pour partage à ce renegat, si Dieu ne luy fait de grandes misericordes: Mais suiuans nostre route, apres la mort de Frãçois Sasousmat dont nous venons de parler, ce bon homme ennuyé de n'auoir auec qui s'entretenir: car pas vn de nous ne sçait [16] encores parfaictement la langue, se retira auec sa femme & auec ses enfans, mais la maladie dont il estoit desia attaqué, s'augmentant, il presse sa femme & ses enfans de le ramener auec nous, esperant la mesme charité qu'il auoit veu exercer enuers son compatriote, on le receut à bras ouuerts, ce qu'ayant apperceu, il s'escria, ie mourray maintenant content puis que ie suis auec vous. Or comme ses erreurs auoient vieilly auec luy, nos Peres recogneurent qu'il pensoit autant & plus à la santé de son corps qu'au salut de son ame, tesmoignant vn grand desir de viure, remettant son Baptesme iusques à mon retour, neantmoins comme il s'alloit affoiblissant ils souhaitterent de le voir vn petit plus affectiõné à nostre creance, ce qui les incita d'offrir à Dieu vne neufuaine à l'hõneur du glorieux Espoux de la saincte Vierge pour le bien de son ame, le cõmencement de cette deuotion fut le commencement de ses volontez plus ardantes, il se monstra fort desireux d'estre instruit commençant à mespriser ses superstitions, il ne voulut plus dormir qu'il n'eust au prealable prié Dieu, ce qu'il faisoit encores deuant & apres sa refection, [17] si bien qu'il differa vne fois plus de demie-heure à mãger ce qu'õ luy auoit presenté, pource qu'on ne