Le cinquiesme fut baptizé le mesme iour, son Pere auoit tesmoigné au sieur Oliuier truchement, qu'il eut bien voulu qu'on eust fait à son fils ce qu'on fait aux petits enfans François, c'est à dire qu'on l'eust baptizé, le sieur Oliuier m'en ayant donné aduis i'allay voir l'enfant, ie differay le baptesme pour quelques iours, le trouuant encore plein de vie; en fin le P. Buteux & [23] moy l'estans retournez voir, nous appellasmes Monsieur du Chesne, qui nous dit que l'enfant estoit bien mal. ie demanday à son Pere s'il seroit content qu'on le baptizât, tres-cõtent (fit-il,) s'il meurt ie le porteray en ta maison, s'il retourne en santé il sera ton fils, & tu l'instruiras. Ie le nommé Adrian du nom de son Parrain, il se nommoit auparauant Pichichich, son Pere est surnommé des François Baptiscan, il s'appelle en Sauuage Tchimaouirineou, sa mere Matouetchiouanouecoueou. Ce pauure petit âgé d'enuiron 8. mois s'enuola au Ciel, la nuict suiuante son Pere ne manqua pas d'apporter son corps, amenant auec soy dix-huict ou vingt Sauuages, hommes, femmes & enfans, ils l'auoient enueloppé dans des peaux de Castor, & pardessus d'vn grand drap de toile, qu'ils auoient achepté au magazin, & encore pardessus d'vne grande escorce redoublée. Ie déueloppay ce pacquet, pour voir si l'enfant estoit dedans, puis ie le mis dans vn cercueil que nous luy fismes faire, ce qui agrea merueilleusement aux Sauuages: car ils croyent que l'ame [24] de l'enfant se doit seruir en l'autre monde de l'ame, de toutes les choses qu'on luy donne à son depart, ie leur dis bien que cette ame estoit maintenant dedans le Ciel, & qu'elle n'auoit que faire de toutes ces pauuretez neãtmoins nous les laissasmes faire, de peur que si nous les eussions voulu empescher, ce que i'aurois peu faire, (car le Pere chanceloit defia,) les autres ne nous permissent pas de baptizer leurs enfans quand ils seroient malades, où du moins ne les apportassent point apres leur mort. Ces pauures gens furent rauis, voyants cinq Prestres reuestus de surplis honorer ce petit ange Canadien, chantant ce qui est ordonné par l'Eglise, couurans son cercueil d'vn beau parement, & le parsemant de fleurs: nous l'enterrasmes auec toute la solemnité qui nous fut possible.