Ie ne sçay pas quand on parla de me quitter; mais mes Saunages me témoignoient tãt d'affection, & disoiẽt tãt de bien de nous aux autres, qu'ils faisoiẽt enuie à tous les Hurõs que nous rencõtrions, d'embarquer quelqu'vn des nostres. Cela me fait douter, si ce qu'on m'a dit du Maistre de mon canot est vray. Car ceux qui auoiẽt embarqué le Pere Daniel & Baron, voulurent les quitter à l'Isle; mais le Maistre du canot où estoit le Pere Daniel, le voyant mescontent de cela, le fit aussi-tost embarquer, & le porta iusques à ce qu'ils eussent rencontré [131] le Capitaine de la Rochelle, lequel estant de la cognoissance du Pere, pour l'auoir voulu conduire l'an passé, le mit volontiers dans son canot, auec ses deux pacquets. Il luy fit plaisir, & aux Sauuages aussi; car le Pere eust eu encore bien de la peine dans vn canot fort chetif, qui n'auoit que trois hommes languissans, & dont la demeure estoit à douze lieuës loing de la nostre: là où ce Capitaine demeuroit au village, où nous auiõs quelque dessein de nous habituer, & assez proche du lieu où nous sommes; & d'ailleurs son canot estoit fort, & equippé de six puissans Sauuages tous sains & gaillards. Ce bon eschange luy arriua la veille de sainct Ignace au matin, ayant fait le iour precedent naufrage par deux fois. Pour Baron, n'eust esté le Capitaine de l'Isle qui fit remettre ses pacquets dans les canots, [132] il y fust demeuré. Encore ses gens ne luy furent pas si barbares, comme furent autresfois à vn de nos François, ceux qui le ramenoient des Hurons à Kebec. Ce ieune homme surnommé la Marche fust mort dans les bois, si nous n'eussions eu le soin & le credit de le renuoyer chercher plus d'vne lieuë loing du lieu où nous-nous en apperceusmes.