“_Conue chese seit a nostre honurable père, le ercevesque de Canterbiere, primat de toute Engletere, e a touz prelaz de seinte Elise, e a touz Cristiens, qe touz les frères du Temple que sumes ici assemblez et chescune singulere persone par sen sumes cristien nostre seignur Jesu Crist, e creoms en Dieu Père omnipotent, qui fist ciel e terre, e en Jesu soen fiz, qui fust conceu du Seint Esperit, nez de la Virgine Marie, soeffrit peine e passioun, morut sur la croiz pour touz peccheours, descendist e enferns, e le tierz jour releva de mort en vie, e mounta en ciel, siet au destre soen Père, e vendra au jour de juise, juger les vifs, e les morz, qui fu saunz commencement, e serra saunz fyn; e creoms comme seynte eglise crets, e nous enseigne. E que nostre religion est foundée sus obedience, chasteté, vivre sans propre, aider a conquere la seint terre de Jerusalem, a force e a poer, qui Dieu nous ad preste. E nyoms e firmement en countredioms touz e chescune singulere persone par sei, toutes maneres de heresies e malvaistes, que sount encountre la foi de Seinte Eglise. E prioms pour Dieu e pour charité a vous, que estes en lieu nostre seinte père l’apostoile, que nous puissoms aver lez drettures de seinte église, comme ceus que sount les filz de sainte église, que bien avoms garde, e tenu la foi, e la lei de seinte église, e nostre religion, la quele est bone, honeste e juste, solom les ordenaunces, e les priviléges de la court de Rome avons grauntez, confermez, e canonizez par commun concile, les qels priviléges ensemblement ou lestablisement, e la règle sount en la dite court enregistrez. E mettoms en dur e en mal eu touz Cristiens sauue noz anoisourz, par la ou nous avoms este conversaunt, comment nous avoms nostre vie demene. E se nous avoms rien mesprys de aucun parole en nos examinacions par ignorance de seu, si comme nous sumez genz laics prest sûmes, a ester a lesgard de seint eglise, comme cely que mourust pour nouz en la beneite de croiz. E nous creoms fermement touz les sacremenz de seinte église. E nous vous prioms pour Dieu e pour salvacioun de vous almes, que vous nous jugez si comme vous volez respoundre pour vous et pour nous devaunt Dieu: e que nostre examinement puet estre leu e oii devaunt nous e devaunt le people, salom le respouns e le langage que fust dit devaunt vous, e escrit en papier._”