In die pasche ante matutinas conueniant clerici ed ecclesiam accensis cunctis cereis per ecclesiam: duo excellenciores presbiteri in superpelliceis ad sepulchrum accedant prius incensato ostio sepulchri cum magna ueneratione, corpus dominicum super altare deponant: deinde crucem de sepulchro tollant, excellenciore presbitero inchoante antiphonam _Christus resurgens_ et sic eant, per ostium australe presbiterii incedentes, per medium chori regredientes, cum thuribulario et ceroferariis precedentibus, ad altare sancti martini canentes praedictam antiphonam cum uersu suo. Deinde dicto uersiculo _Surrexit dominus de sepulchro_, et dicta oracione ab excellenciore sacerdote post debitam campanarum pulsacionem inchoentur matutine. [From the _Ordinal_.] _In Die Pasche_ _Ad Processionem ante Matutinas_ conueniant omnes clerici ad ecclesiam ac accendantur luminaria per ecclesiam. Episcopus uel decanus in superpelliceo cum ceroferariis thuribulariis et clero in sepulcrum accedant, et incensato prius sepulcro cum magna ueneracione corpus domini assumant et super altare ponant. Iterum accipientes crucem de sepulcro inchoet episcopus uel decanus Ant. _Christus resurgens._ Tunc omnes cum gaudio genua flectant et ipsam crucem adorent, idipsum canentes cum ℣. _Dicant nunc_. Tunc omnes campane in classicum pulsentur, et cum magna ueneracione deportetur crux ad locum ubi prouisum sit, clero canente predictam antiphonam. Quo facto dicat Sacerdos ℣. _Surrexit dominus de sepulcro_. Or. _Deus qui pro nobis._ Que terminetur sic, _Per eundem christum dominum nostrum_. [From the _Breviary_, with which the _Processional_, although less full, practically agrees.]