But there is ane, when I had naething, A' his heart he gi'ed to me; And sair he toil'd for a wee thing, To bring me when he cam frae sea. If ever I should marry ony, He will be the lad for me; For he was baith gude and bonny, And he thought the same o' me. Sae I 'll no, &c. [63] This song is printed from an improved version of the original, by a literary friend of the author. THE MITHERLESS LAMMIE. The mitherless lammie ne'er miss'd its ain mammie, We tentit it kindly by night and by day, The bairnies made game o't, it had a blithe hame o't, Its food was the gowan--its music was "_mai_." Without tie or fetter, it couldna been better, But it would gae witless the world to see; The foe that it fear'd not, it saw not, it heard not, Was watching its wand'ring frae Bonnington Lea. Oh, what then befell it, 't were waefu' to tell it, Tod Lowrie kens best, wi' his lang head sae sly; He met the pet lammie, that wanted its mammie, And left its kind hame the wide world to try. We miss'd it at day-dawn, we miss'd it at night-fa'in', Its wee shed is tenantless under the tree, Ae dusk i' the gloamin' it wad gae a roamin'; 'T will frolic nae mair upon Bonnington Lea. THE ATTAINTED SCOTTISH NOBLES.[64] Oh, some will tune their mournfu' strains, To tell o' hame-made sorrow, And if they cheat you o' your tears, They 'll dry upon the morrow. Oh, some will sing their airy dreams, In verity they're sportin', My sang 's o' nae sic thieveless themes, But wakin' true misfortune. Ye Scottish nobles, ane and a', For loyalty attainted, A nameless bardie 's wae to see Your sorrows unlamented; For if your fathers ne'er had fought For heirs of ancient royalty, Ye 're down the day that might hae been At the top o' honour's tree a'. For old hereditary right, For conscience' sake they stoutly stood; And for the crown their valiant sons Themselves have shed their injured blood; And if their fathers ne'er had fought For heirs of ancient royalty, They 're down the day that might hae been At the top o' honour's tree a'. [64] This song having become known to George IV., it is said to have induced his Majesty to award the royal sanction for the restitution of the title of Baron to Lady Nairn's husband.--(See Memoir.) TRUE LOVE IS WATERED AYE WI' TEARS.[65] True love is water'd aye wi' tears, It grows 'neath stormy skies, It 's fenced around wi' hopes and fears An' fann'd wi' heartfelt sighs. Wi' chains o' gowd it will no be bound, Oh! wha the heart can buy? The titled glare, the warldling's care, Even absence 'twill defy, Even absence 'twill defy.