Post discessum congregationis nostræ, quæ tecum est, valde sumus suspensi redditi, quia nihil de prosperitate vestri itineris audisse nos contigit. Cum ergo Deus Omnipotens vos ad reverendissimum virum, Fratrem nostrum Augustinum Episcopum perduxerit, dicite ei quod diu mecum de causa Anglorum cogitans tractavi; videlicet quia Fana Idolorum destrui in eadem gente minime debeant, sed ipsa quæ in eis sunt Idola destruantur; Aqua benedicta fiat; in eisdem Fanis aspergatur; Altaria construantur; Reliquiæ ponantur, quia, si Fana eadem bene constructa sunt, necesse est ut a cultu Dæmonum in obsequio Veri Dei debeant commutari, ut dum gens ipsa eadem Fana sua non videt destrui, de corde errorem deponat, et Deum Verum cognoscens ac adorans, ad loca quæ consuevit familiariùs concurrat. _Et quia boves solent in sacrificio Dæmonum multos occidere, debet eis etiam, hac de re, aliqua sollemnitas immutari; ut Die Dedicationis, vel Natilitii sanctorum Martyrum, quorum illic Reliquiæ ponuntur, Tabernacula sibi, circa easdem Ecclesias, quæ ex Fanis commutatæ sunt, de ramis arborum faciant, et Religiosis convivis sollemnitatem celebrant._ Nec Diabolo jam animalia immolent; et, ad laudem Dei, in esu suo animalia occidant, et Donatori omnium de satietate sua gratias referant; ut dum eis aliqua exteriùs gaudia reservantur, ad interiora gaudia consentire faciliùs valeant. Nam duris mentibus simul omnia abscindere impossibile esse non dubium est; quia et is qui summum locum ascendere nititur gradibus vel passibus, non autem saltibus elevatur; sic Israelitico populo in Ægypto Dominus re quidem innotuit; sed tamen eis sacrificiorum usus, quæ Diabolo solebat exhibere, in cultu proprio reservavit, et eis in suo sacrificio animalia immolare præciperet, quatenus cor mutantes, aliud de sacrificio amitterent, aliud retinerent; ut etsi ipsa assent animalia quæ efferare consueverant, vero tamen Deo hæc et non Idolis immolantes jam sacrificia ipsa non essent. Hæc igitur dilectionem tuam prædicto Fratri necesse est dicere, ut ipse in præsenti illic positus perpendet, qualiter omnia debeat dispensare. Deus te incolumem custodiat, dilectissime Fili! Data die decima quinta kalendarum Juliarum, imperante Domino nostro Mauricio Tiberio piissimo Augusto, anno decimo novo; post consulatum ejusdem Domini anno decimo octavo; Indictione quarta. A. D. 601. It may be presumed that the Jesuit missionaries to China and to Paraguay were not unacquainted with this letter from the Pope.