_Cl. Col._ Syr, so it is, this man is here by, That for hym to laboure he hath prayde me hartely; Notwithstandynge to you be it sayde, 1670 To trust in me he is but dyssayued; For, so helpe me God, for you he is not mete: I speke the softlyer, because he sholde not wete. _Magn._ Come hyder, Pleasure, you shall here myne entent: Mesure, ye knowe wel, with hym I can not be content, And surely, as I am nowe aduysed, I wyll haue hym rehayted and dyspysed. Howe say ye, syrs? herein what is best? _Court. Ab._ By myne aduyse with you in fayth he shall not rest. _Cl. Col._ Yet, syr, reserued your better aduysement, 1680 It were better he spake with you or he wente, That he knowe not but that I haue supplyed All that I can his matter for to spede. _Magn._ Nowe, by your trouthe, gaue he you not a brybe? _Cl. Col._ Yes, with his hande I made hym to subscrybe A byll of recorde for an annuall rent. _Court. Ab._ But for all that he is lyke to haue a glent. _Cl. Col._ Ye, by my trouthe, I shall waraunt you for me, And he go to the deu[y]ll, so that I may haue my fee, What care I? 1690 _Magn._ By the masse, well sayd. _Court. Ab._ What force ye, so that ye[840] be payde? _Cl. Col._ But yet, lo, I wolde, or that he wente, Lest that he thought that his money were euyll spente, That ye[841] wolde loke on hym, thoughe it were not longe. _Magn._ Well cannest thou helpe a preest to synge a songe. _Cl. Col._ So it is all the maner nowe a dayes, For to vse suche haftynge and crafty wayes. _Court. Ab._ He telleth you trouth, syr, as I you ensure. _Magn._ Well, for thy sake the better I may endure 1700 That he come hyder, and to gyue hym a loke That he shall lyke the worse all this woke. _Cl. Col._ I care not howe sone he be refused, So that I may craftely be excused. _Court. Ab._ Where is he? _Cl. Col._ Mary, I made hym abyde, Whylest I came to you, a lytell here besyde. _Magn._ Well, call hym, and let vs here hym reason, And we wyll be comonynge in the mene season. _Court. Ab._ This is a wyse man, syr, where so euer ye hym had. 1710 _Magn._ An honest person, I tell you, and a sad. _Court. Ab._ He can full craftely this matter brynge aboute. _Magn._ Whylest I haue hym, I nede nothynge doute. _Hic introducat COLUSION, MESURE, MAGNYFYCENCE aspectant[e] vultu elatissimo._ _Cl. Col._ By the masse, I haue done that I can, And more than euer I dyd for ony man: I trowe, ye herde yourselfe what I sayd. _Mes._ Nay, indede; but I sawe howe ye prayed, And made instance for me be lykelyhod. _Cl. Col._ Nay, I tell you, I am not wonte to fode Them that dare put theyr truste in me; 1720 And therof ye shall a larger profe se.