And from thens, men gon thorghe litille Ermonye. And in that contree is an old castelle, that stont upon a roche, the whiche is cleped the Castelle of the Sparrehawk, that is bezonde the cytee of Layays, beside the town of Pharsipee, that belongethe to the lordschipe of Cruk; that is a riche lord and a gode Cristene man; where men fynden a sparehauk upon a perche righte fair, and righte wel made; and a fayre lady of fayrye, that kepethe it. And who that wil wake that sparhauk, 7 dayes and 7 nyghtes, and as sum men seyn, 3 dayes and 3 nyghtes, with outen companye, and with outen sleep, that faire lady schal zeven him, whan he hathe don, the first wyssche, that he wil wyssche, of erthely thinges: and that hathe been proved often-tymes. And o tyme befelle, that a kyng of Ermonye, that was a worthi knyght and doughty man and a noble prince, woke that hauk som tyme: and at the ende of 7 dayes and 7 nyghtes, the lady cam to him, and bad him wisschen: for he had wel disserved it. And he answerde, that he was gret Lord y now, and wel in pees, and hadde y nowghe of worldly ricchesse: and therfore he wolde wisshe non other thing, but the body of that faire lady, to have it at his wille. And sche answerde him, that he knew not what he asked; and seyde, that he was a fool, to desire that he myghte not have; for sche seyde, that he scholde not aske, but erthely thing: for sche was non erthely thing, but a gostly thing. And the kyng seyde, that he ne wolde asken non other thing. And the lady answerde, sythe that I may not withdrawe zou fro zoure lewed corage, I schal zeve zou with outen wysschinge, and to alle hem that schulle com of you. Sire kyng, zee schulle have werre withouten pees, and alle weys to the 9 degree, zee schulle ben in subjeccioun to zoure enemyes; and zee schulle ben nedy of alle godes. And nevere sithen, nouther the kyng of Ermoyne, ne the contree, weren never in pees, ne thei hadden never sithen plentee of godes; and thei han ben sithen alle weyes undre tribute of the Sarrazines. Also the sone of a pore man woke that hauke, and wisshed that he myghte cheve wel, and to ben happy to merchandise. And the lady graunted him. And he becaam the most riche and the most famouse marchaunt, that myghte ben on see or on erthe. And he becam so riche, that he knew not the 1000 part of that he hadde: and he was wysere, in wisschynge, than was the king. Also a knyght of the temple wooke there; and wyssched a purs evere more fulle of gold: and the lady graunted him. But sche seyde him, that he had asked the destruccioun of here ordre; for the trust and the affiance of that purs, and for the grete pryde, that they scholde haven: and so it was. And therfore loke, he kepe him wel, that schalle wake: for zif he slepe, he is lost, that nevere man schalle seen him more. This is not the righte weye for to go to the parties, that I have nempned before; but for to see the merveyle, that I have spoken of.