And for als moche as it is longe tyme passed, that there was no generalle passage ne vyage over the see; and many men desiren for to here speke of the holy lond, and han thereof great solace and comfort; I John Maundevylle, Knyght, alle be it I be not worthi, that was born in Englond, in the town of Scynt Albones, passed the see in the zeer of our Lord Jesu Crist MCCCXXII, in the day of Seynt Michelle; and hidre [Footnote: There.] to have ben longe tyme over the see, and have seyn and gon thorghe manye dyverse londes, and many provynces and Kingdomes and iles, and have passed thorghe Tartarye, Percye, Ermonye [Footnote: Armenia.] the litylle and the grete; thorghe Lybye, Caldee, and a gret partie of Ethiope; thorghe Amazoyne, Inde the lasse and the more, a gret partie; and thorghe out many othere iles, that ben abouten Inde; where dwellen many dyverse folkes, and of dyverse manneres and lawes, and of dyverse schappes of men. Of which londes and iles, I schall speake more pleynly hereaftre. And I schall devise zou sum partie of thinges that there ben, whan time schalle ben, aftre it may best come to my mynde; and specially for hem, that wylle and are in purpos for to visite the holy citee of Jerusalem, and the holy places that are thereaboute. And I schalle telle the weye, that thei schulle holden thidre. For I have often tymes passed and ryden the way, with gode companye of many lordes: God be thonked. And zee schulle undirstonde, that I have put this boke out of Latyn into Frensche, and translated it azen out of Frensche into Englyssche, that every man of my nacioun may undirstonde it. But lordes and knyghtes and othere noble and worthi men, that conne Latyn but litylle, and han ben bezonde the see, knowen and undirstonden, zif I erre in devisynge, for forzetynge, [Footnote: Forgetting.] or elles; that thei mowe redresse it and amende it. For thinges passed out of longe tyme from a mannes mynde or from his syght, turnen sone into forzetynge: Because that mynde of man ne may not ben comprehended ne witheholden, for the freeltee of mankynde. To teche zou the Weye out of Englond to Constantinoble. [Sidenote: Cap I.] In the name of God Glorious and Allemyghty. He that wil passe over the see, to go to the city of Jerusalem, he may go by many wayes, bothe on see and londe, aftre the contree that hee cometh fro; manye of hem comen to on ende. But troweth not that I wil telle zou alle the townes and cytees and castelles, that men schulle go by; for than scholde I make to longe a tale; but alle only summe contrees and most princypalle stedes, that men schulle gone thorgh, to gon the righte way. CAPVT. 2. Iter ab Anglia tam per terras quam per aquas vsque in Constantinopolim.